Даследчыкі з Медыцынскага ўніверсітэта Беластока вызначылі генетычны варыянт, які больш чым у два разы павялічвае рызыку цяжкага ходу інфекцыі і смерці ад COVID-19. Яны вызначылі, што, акрамя сталага ўзросту і атлусцення, фактарам рызыкі таксама з’яўляецца генетычны профіль. Гэта нават больш істотна, чым спадарожныя захворванні.
Прадстаўнік універсітэта Марцін Томкель растлумачыў, што дзякуючы даследаванню стане больш зразумела, чаму нават сярод людзей падобнага ўзросту адны праходзяць інфекцыю бессімптомна, а іншыя змагаюцца за жыццё, не заўсёды гэтую барацьбу перамагаючы, піша Wyborcza.pl.
У праекце пад кіраўніцтвам прафесара, доктара медыцынскіх навук Марціна Манюшкі і і доктара біялагічных навук Міраслава Квасьнеўскага ўдалося ідэнтыфікаваць генетычны варыянт, які больш чым у два разы павялічвае рызыку цяжкага ходу і смерці ад COVID-19. Паводле ацэнак, такі генетычны варыянт маюць да 14 працэнтаў палякаў, а ў цэлым у Еўропе ён сустракаецца ў прыкладна 9 працэнтаў насельніцтва.
У даследаванні прынялі ўдзел амаль паўтары тысячы пацыентаў з каранавірусам. Больш чым у два разы ўразлівымі да цяжкага і нават смяротнага ходу COVID-19 нас робіць наяўнасць адной з версій гена, размешчанага на трэцяй храмасоме. Навукоўцы лічаць, што з’яўленне даступнага тэсту на такі ген дапаможа яшчэ да пачатку інфекцыі дапамагчы лепш ідэнтыфікаваць людзей, якія ў выпадку заражэння могуць цяжка пераносіць хваробу. Тады такія людзі маглі б загадзя атрымаць асаблівую прафілактычную і медыцынскую дапамогу.
