12 студзеня прэс-служба гарадзенскага “Нёмана” аб’явіла аб вяртанні ў каманду 27-гадовага беларускага нападніка Паўла Савіцкага. Футбаліст са скандалам у 2017 годзе перайшоў у клуб галоўнага ворага “Нёмана” – Дынама-Брэст”. Гарадзенскія фанаты тады не ацанілі ўчынак Савіцкага, сказаўшы, што дзеля грошай ён здрадзіў роднай камандзе. Сёння вяртанне былога лідэра ў Гродна не ва ўсіх выклікае станоўчыя эмоцыі.
Савіцкі з 2018 года абараняў колеры брэсцкага “Дынама”, пасля чаго перайшоў у “Рух”. У складзе “Руху” Савіцкі правёў 28 афіцыйных паядынкаў, у якіх забіў 4 мячы і аддаў 5 дзейсных перадач. Кантракт з “Нёманам” у Савіцкага разлічаны на год.
Фанаты не прымуць
Адзін з лідэраў фанацкага руху GrodnoUltras Віталь Будзько кажа, што Савіцкі не вельмі прыгожа пакінуў родны клуб у 2018 годзе, калі перайшоў у склад “Дынама”. Таму падтрымліваць яго актыўны сектар “Нёмана” не плануе.
“У фанатаў будзе не самая аб’ектыўная на ягоны конт думка. Магчыма, на дадзены момант “Нёман” для сённяшняга ўзроўня Савіцкага гэта мяжа, і тут сама камфортна зарабляць грошы моцна не напружваючыся”, – сказаў Віталь Будзько.
Другі сезон запар фанаты “Нёмана” байкатуюць матчы каманды. Спачатку гэта было звязана с каронавірусам, а пасля пратэст быў звязаны с палітычнай сітуацыяй у краіне. Напэўна, ў 2022 годзе актыўны сектар “Нёмана” працягне байкот матчаў каманды з-за палітычнай сітуацыі ў краіне.
Бытавы пераход
Спартовы аглядальнік з Гродна Яўген Лебедзь таксама лічыць, што мясцовыя фанаты не прымуць Савіцкага, а яго вяртанне ў “Нёман” – чыста бытавы пераход.
“Любы чалавек рана ці позна хоча вярнуцца ў родны горад, дзе жывуць твае блізкія, дзе табе пасля тулянняў па іншых гарадах спакойна і камфортна. Такі ж шлях, напрыклад, да Савіцкага прарабіў Аляксей Лягчылін. Узмоцніць “Нёман”, ці не, сказаць цяжка. Мы не ведаем, якім будзе склад каманды ў сакавіку-красавіку, мы не ведаем, у якой форме знаходзіцца гулец. Ці прымуць яго фанаты? Не. Яны не прынялі яго, калі ён падышоў да трыбуны пасля першага матча ў Гродне ў складзе “Дынама”. Думаю, што і зараз нічога не памяняецца. Памятаеце вяртанне Дзенісевіча з “Шахцёра”? Яго таксама не прынялі. Гарадзенскія фанаты адрозніваюцца прынцыповасцю ў гэтых пытаннях. Хаця, мне здаецца, Савіцкаму будзе ўсё роўна, ён паспрабуе надаць увагу гульні, наколькі гэта магчыма. Асабіста мне ўсё роўна, што вярнуўся Савіцкі. Калі б з Брэста ён з’ехаў гуляць у Маскву, я б таксама не здзівіўся і ніяк не адрэагаваў”, – сказаў Лебедзь.
У мінулым сезоне “Нёман” спыніўся на 11-м радку ў турнірнай табліцы. Галоўны трэнер каманды Ігар Кавалевіч падчас чэмпіянату збіраўся пакінуць сваю пасаду, але ў новым годзе падпісаў новы кантракт з гарадзенскай камандай.
