19 студзеня на пляжы ў Дайлідах беларусы акуналіся ў сцюдзёную ваду і дзяліліся ўражаннямі.
Сярод удзельнікаў быў Віталь Будзько з Гародні, які разоў дзесяць акунаўся на Вадохрышча на гарадзенскім Юбілейным возеры. Сёлета ён адным з першых апрабаваў беластоцкое месца для акунання.
Гарадзенец расказаў, як трэба рыхтавацца да абраду:
— За пару тыдняў, за месяц пачынаеш прымаць халодны душ. Можаш пачаць з цёплай вады, паступова пераключаць на халодную. Па часе — на колькі можаш. Каб калі палезеш у ваду, не было адразу такога моцнага шоку, каб арганізм быў хаця б крыху падрыхтаваны. Бо дома можаш адразу адагрэцца, а вось на вуліцы халодна.
Пасля акунання Віталь раіць размяцца, выпіць гарачай гарбаты.
— Калі вялікі мароз, пажадана, каб адзенне было свабодным, — дадае гарадзенец. — Бо джынсы пасля нацягнуць цяжка, дубянеюць.
