Аляксандр Івулін, стваральнік YouTube-канала «ЧестнОК», і за кратамі застаецца працаўніком футбольнага клуба «Крумкачы», бо падчас следства клуб падпісаў з ім новы кантракт.
Як патлумачылі для MOST крыніцы, блізкія да ФК «Крумкачы», юрыдычна няма абмежаванняў на заключэнне кантракта са зняволеным, бо чалавек за кратамі не пазбаўлены права падпісваць дакументы.
Зрабілі так, таму што адвакат папрасіў далучыць да справы ў якасці змякчальных абставінаў некалькі дакументаў: характарыстыку з месца працы і гарантыю працаўладкавання пасля вызвалення. Кантракт і стаў гарантыяй працаўладкавання для Аляксандра. І акцыяй падтрымкі.
MOST: Ці ўсе ў клубе салідарныя з рашэннем і ці не баяцца наступстваў?
— Усе хлопцы ў клубе рашэнне падтрымалі, некаторыя прысутнічалі на судовым паседжанні. Канешне, Сашы і яго бацькам важная падтрымка. Яму прыходзіць шмат лістоў і дзіцячых малюнкаў. Гэта дапамагае не траціць надзею.
Сёння Фонд спартовай салідарнасці абвесціў збор сродкаў для падтрымкі сям’і Аляксандра Івуліна. На ўтрыманні блогера былі пажылыя бацькі і брат-інвалід.
Зрабіць перавод можна праз старонку БФСС https://bssf-team.web.app або іншымі спосабамі, пазначанымі ў паведамленні Фонда.
