Пасля трох сутак арышту гродзенскі журналіст Міхаіл Карневіч выйшаў на волю. Яму далі штраф памерам у 800 рублёў. Такое пакаранне журналіст атрымаў за рэпост інфармацыі ў сацыяльных сетках.
Карневіч расказаў «Народнай Волі», што да яго прыйшлі з ператрусам у пятніцу, 21 студзеня, каля гадзіны дня. Канфіскавалі камп’ютар, тэлефон. Тэлефон быццам бы павінны бліжэйшым часам вярнуць. Потым прапанавалі паехаць у мясцовы райаддзел на размову — маўляў, літаральна на гадзіну. А бліжэй да дзясятай гадзіны вечара журналіст апынуўся ў ізалятары часовага ўтрымання, дзе і правёў выхадныя.
— Дзякуй Богу, што на волі! — сказаў Міхаіл Карневіч.
Апошнім часам гродзенскі журналіст супрацоўнічае з выданнем «Народная Воля». За які рэпост яго пакаралі штрафан, журналіст не паведаміў.
На 24 студзеня вядома аб 33 прадстаўніках медыя Беларусі, якія зараз знаходзяцца ў зняволенні. Яны былі затрыманыя ў 2020-2022 гг.
