У варшаўскім раёне Воля будзе ўсталяваны помнік героям беларускай рэвалюцыі, паведамляе Gazeta Wyborcza. Яго размесцяць у парку Шыманскага — найбуйнейшым парку ў раёне Воля. Як піша «Радыё Свабода», сярод ушанаваных асобаў будуць Анджэй Пачобут, Анжаліка Борыс, Марыя Калеснікава і Сяргей Ціханоўскі.
Над інсталяцыяй пад назвай «Праспект узыходзячага сонца» працуе вядомы польскі скульптар Павел Альтхамер. Яна будзе складацца з 7 адлітых з алюмінію фігур, якія прадстаўляюць дэмакратычных актывістаў, зняволеных рэжымам Лукашэнкі. Гаворка ідзе, сярод іншых, пра журналіста і польскага актывіста Анджэя Пачобута, кіраўніцу Саюза палякаў у Беларусі Анжаліку Борыс, прадстаўніцу перадвыбарнага штабу Віктара Бабарыкі Марыю Калеснікаву, беларускага блогера і прэтэндэнта ў прэзідэнты Сяргея Ціханоўскага, які трапіў за краты за тры месяцы да выбараў.
Паводле скульптара, размаляваныя залатым колерам фігуры беларускіх герояў будуць ісці з высока ўзнятай галавой, як быццам іх толькі што вызвалілі з няволі. «Скульптура павінна нагадаць пра зняволеных актывістаў і адначасова паказаць, што ў іх у Польшчы ёсць сябры, што мы пакутуем разам з беларусамі», — кажа скульптар.
— Такім чынам мы хочам сімвалічна падтрымаць беларусаў на самым складаным этапе барацьбы за свабоду. Цяпер Беларусь аказалася ў тым месцы, у якім была Польшча пасля абвяшчэння ваеннага становішча, — лічыць мэр Волі Кшыштаф Стшалкоўскі.
— Мне вельмі падабаецца гэтая ідэя, — кажа пра помнік прэзідэнт Варшавы Рафал Тшаскоўскі.
