Прэс-сакратар беларускага МЗС Анатоль Глаз заявіў 2 лютага, што ў беларускіх пасольстваў не будзе выбарчых участкаў падчас рэферэндуму ў Беларусі, які пройдзе 27 лютага. Беларусы, якія пражываюць за мяжой, змогуць узяць удзел у рэферэндуме, толькі вярнуўшыся ў Беларусь.
Прычын адсутнасці участкаў для галасавання, па словах Глаза, некалькі: эпідэмія каронавіруса, не хапае супрацоўнікаў, ахова, а таксама ў некаторых пасольствах на ўліку занадта мала людзей.
— Пры гэтым абсалютны прыярытэт — забеспячэнне бяспекі грамадзян, так і членаў камісіі, дыпламатаў і работнікаў замежных устаноў, — падкрэсліў прэс-сакратар МЗС. — На сённяшні дзень больш за траціну замежных устаноў не ўтваралі ўчасткі па прычыне нязначнай колькасці грамадзян, якія знаходзяцца на консульскім уліку.
Глаз адзначыў, што падчас папярэдняй выбарчай кампаніі ў адрас членаў выбаркамаў і работнікаў замежных устаноў паступалі шматлікія пагрозы, рабіліся правакацыі і акцыі хуліганскага і экстрэмісцкага характару.
Прадстаўнік МЗС упэўнены, што гэтыя абмежаванні “не перашкаджаюць канстытуцыйнаму праву грамадзян Беларусі прыняць удзел у маючым адбыцца рэферэндуме”. Тыя, хто знаходзіцца за мяжой часова, паводле яго слоў, змогуць прагаласаваць па месцы рэгістрацыі ў Беларусі, а тыя, хто жыве ў іншых краінах пастаянна і маюць пашпарт серыі PP, — на ўчастку для галасавання па месцы часовай рэгістрацыі або месцы апошняга пражывання ў Беларусі. .
27 лютага ў Беларусі адбудзецца ініцыяваны ўладамі краіны рэферэндум па змене Канстытуцыі. Галасаванне будзе праходзіць ва ўмовах бесперапыннага палітычнага крызісу, апазіцыя прадставіла сваю стратэгію — беларусаў заклікаюць прыходзіць на ўчасткі і рабіць бюлетэнь несапраўдным, закрэсліваючы абодва варыянты волевыяўлення.
