На мінулым тыдні польскія паліцэйскія затрымалі ўкраінца. Мужчына перавозіў двух сірыйцаў, якія нелегальна перайшлі мяжу. Аб гэтым паведамляе прэс-служба паліцыі Падляшша.
У чацвер, 17 лютага, у Чарэмсе паліцэйскія затрымалі ўкраінца, які перавозіў нелегальных мігрантаў. Паліцэйскі патруль заўважыў аўтамабіль Fiat на таруньскіх рэгістрацыйных нумарах. Паліцэйскія некалькі разоў прасілі кіроўцу спыніцца. Машына спынілася каля лесу, у які збеглі двое чалавек. У салоне застаўся толькі кіроўца, які аказаўся 33-гадовым грамадзянінам Украіны. Двух чалавек — грамадзян Сірыі — затрымалі ў лесе паліцэйскія сумесна з вайскоўцамі.
Сірыйцаў перадалі памежнай службе, а кіроўца трапіў у паліцэйскі пастарунак.
Мужчыну абвінавачваюць у дапамозе ў незаконным перасячэнні мяжы і невыкананні правіл дарожнага руху. За дапамогу нелегальным мігрантам украінцу пагражае да 8 гадоў зняволення.
