22 лютага ў Брэсце адбыўся трэці па ліку аўкцыён па продажы пляцоўкі з незавершанай будоўляй у самым цэнтры горада. Там, дзе ў 2019 годзе знайшлі масавыя астанкі вязняў Брэсцкага гета.
MOST расказваў гісторыю з будаўніцтвам жылля ў месцы з трагічнай гісторыяй — выглядае, яна набліжаецца да развязкі. Некалькі гадоў гарадскія ўлады Брэста шукалі інвестараў, якія б пагадзіліся выкупіць аб’ект і давесці будоўлю да канца. Нарэшце, з трэцяй спробы і пасля паніжэння кошту на 50%, пакупнік знайшоўся — за 2 мільёны рублёў пляцоўку і права заключэння дамовы арэнды набыла мінская фірма «АйранІнвестПраект». У аўкцыёне прымалі ўдзел дзве кампаніі, пераможца быў вызначаны на трэцім кроку.
Пра кампанію «АйранІнвестПраект» вядома, што яна раней ужо набывала ўчасткі пад будаўніцтва жылля ў Мінску, Брэсце і Гродне. Так, у красавіку 2020 года фірма набыла права забудовы ўчастка на вуліцы Савецкіх Пагранічнікаў у Гродне.
