23 лютага адвакатку юрыдычнай кансультацыі Кастрычніцкага раёна Гродна Юлію Юргілевіч выключылі з Гродзенскай абласной калегіі адвакатаў. Прычына — «сістэматычныя парушэнні заканадаўства», паведамляе партал Hrodna.life.
Юлію Юргілевіч выключылі з абласной калегіі падчас пасяджэння арганізацыі, якое правялі па позве пракурора вобласці Андрэя Скурата. Прычынай сталі дысцыплінарныя спагнанні за парушэнне закону аб адвакатуры. Маўляў, адвакат некваліфікавана аказвала дапамогу і сістэматычна парушала заканадаўства.
Праз некалькі дзён Юргілевіч пазбавяць і адвакацкай ліцэнзіі.
Юлія Юргілевіч у прафесіі — амаль 18 гадоў. Яна абараняла ў судзе Вольгу Верамеенка з крамы «Адметнасць» і Андрэя Сакалоўскага па справе аб счэпцы, Андрэя Аўсіевіча, якога асудзілі за каментарый. У Юргілевіч засталіся дзесяць кліентаў, якія знаходзяцца пад следствам. Сярод іх — трое абвінавачваных па «справе Зэльцара», а таксама вядомы мастак Алесь Пушкін.
