Заснавальнік ініцыятывы BY_help Аляксей Лявончык расказаў MOST, куды звяртацца беларусам, якія цяпер у Беларусі і хочуць з’ехаць.
Вы ў Беларусі, не засвяціліся па палітыцы і не маеце віз
— Можна ляцець туды, куды яшчэ лятаюць самалёты: Турцыя, Грузія, Арменія — любая краіна, дзе няма абмежавання на авіяспалучэнне і дзе беларусам не трэба віза. Гэта магчыма пакуль што, але ўжо шэсць еўрапейскіх краін забаранілі паветраныя прасторы для расійскіх авіякампаній, а беларускія і так не ляталі, да таго ж вялікая зона «no fly» над паўночна-ўсходняй мяжой Украіны.
Паветраную прастору для расійскіх самалётаў закрылі Чэхія, Балгарыя, Эстонія, Латвія, Брытанія, Румынія, Літва. То колькасць кірункаў, куды можна паляцець «Аэрафлотам», не такая вялікая. У Грузію расійскія авіякампаніі не лятаюць, туды можна дабрацца «Белавіяй». З Масквы можна вылецець у Арменію і Турцыю.
Не думаю, што яшчэ доўга будзе магчымасць выляцець у Турцыю. Я разумею, што Эрдагану такі бардак на паўночнай мяжы не патрэбны, то з яго боку таксама могуць быць крокі ў адказ.
Калі ўсё пойдзе яшчэ горш, то для беларусаў застанецца маршрут да Масквы, адтуль да Іркуцка, адтуль у Кітай, які для нас пакуль яшчэ без віз. Яшчэ і ў Казахстан можна.
Калі збіраецеся вылятаць, рыхтуйцеся, што гэта будзе доўга і дорага. Напрыклад, сёння з Мінска ёсць два рэйсы на Стамбул, і яны робяць вялікую дугу. Можна ляцець у Грузію — там вялікая беларуская дыяспара, шмат еўрапейскіх амбасадаў, і там можна находзіцца без візы 365 дзён. У Турцыі амбасады ёсць у некалькіх гарадах, пазіцыя Эрдагана наконт вайны зразумелая і прапуцінскіх крокаў чакаць ад яго не выпадае. Без візы ў Турцыі можна знаходзіцца 30 дзён, і там прасцей знайсці працу.
Ёсць віза і не прыцягваўся па палітыцы
— Наземным транспартам едзьце ў Польшчу ці Літву. Палякі вас пусцяць пры любых акалічнасцях. Патрэбна толькі пацвярджэнне, што чалавек нібыта працуе ў Польшчы. Рабіце рабочы кантракт — у Беларусі фірм, якія робяць такія паперы, шмат. Можна выехаць і на медыцынскіх падставах.
Няма візы і прыцягваўся па палітыцы
— Хутчэй за ўсё вы ў чорным спісе і невыяздныя ні з Беларусі, ні з Расіі. Беларускія памежнікі вас арыштуюць за парушэнне падпіскі аб нявыездзе, а расійскія развернуць і адправяць разбірацца з міліцыяй. Мы праходзілі гэта кучу разоў.
Але і з такіх сітуацый ёсць выйсце. Калі вы лічыце, што вам пагражае небяспека, звяртайцеся да BY_help. Калі вас патрэбна эвакуяваць з Беларусі і вы маеце пагрозу бяспецы, пішыце ў тэлеграм Аляксею Лявончыку: t.me/eolonir. Адразу ж апішыце сваю сітуацыю і патлумачце, чаму яна пільная.
Ёсць віза і вы невыяздны
— Для вас працуе тое самае, што ў папярэднім пункце. З Беларусі і Расіі вы не зможаце выехаць легальна.
Аляксей Лявончык падкрэсліў, што не гарантуе, што змогуць дапамагчы ўсім.
— У першую чаргу дапамагаем тым, у каго рэальная перспектыва, што заграбуць або што сядуць больш чым на два гады, — тлумачыць Лявончык.
Кожную сітуацыю арганізацыя ацэньвае індывідуальна.
Калі плануеце зрабіць візу
У Беларусі працуе літоўская і польская амбасады. Запісвайцеся і рабіце гуманітарныя візы. Калі маеце пагрозу і актывісцкі бэкграунд, можаце звярнуцца па дапамогу аб паскоранай выдачы праз Лявончыка (t.me/eolonir, у першым жа паведамленні апішыце сваю сітуацыю і патлумачце, чаму яна пільная).
— Упэўнены, што польская і літоўская амбасады ў Беларусі будуць працаваць да апошняга. Не выключаю, што іншыя краіны могуць свае амбасады закрыць, — кажа Аляксей Лявончык.
