Улады Беластока хочуць перайменаваць фрагмент вуліцы, дзе месціцца консульства Беларусі. Цяпер вуліца называецца Электрычнай, а па прапанове мясцовага ўраду яе частка можа быць перайменаваная ў вуліцу Вольнай Украіны. MOST запытаўся ў прадстаўнікоў беларускай і ўкраінскай дыяспар, што яны думаюць на гэты конт.
Прэзідэнт Беластока Тадэвуш Трускаляскі прапанаваў перайменаваць частку вуліцы Электрычнай, дзе месціцца беларускае консульства, у вуліцу Вольнай Украіны. Гаворка пра фрагмент вуліцы ад Варшаўскай да Браніцкага. Трускаляскі ўпэўнены, што жыхары Беластока ўхваляць гэту прапанову.
Chcemy, żeby fragment ul. Elektrycznej #Białystok, od ul. Warszawskiej do ul. Branickiego, gdzie mieści się https://t.co/GhEf6ePOHL. Konsulat Białorusi, nosił nazwę Wolnej Ukrainy. Liczę, że zameldowani przy tej ulicy białostoczanie zaakceptują ten pomysł #SolidarniZUkraina???? pic.twitter.com/DbCOkb98iV
— Tadeusz Truskolaski (@TTruskolaski) March 4, 2022
Украінскі айцішнік Антон, які жыве ў Беластоку, лічыць перайменаванне вуліцы добрым знакам:
— Гэта паказвае ўзровень салідарнасці Польшчы і Украіны. Таксама ўвесь свет убачыў, які народ насамрэч з’яўляецца брацкім. Няхай гэта будзе пастаянным напамінам супрацоўнікам беларускага МЗС, калі яны адпраўляюць ці атрымліваюць карэспандэнцыю.
Прадстаўнік беларускай дыяспары Ян Абадоўскі падтрымлівае ідэю перайменавання вуліцы.
— Лічу гэта вельмі вялікім жэстам салідарнасці з народам Украіны, які сёння змагаецца з расійскай агрэсіяй. Гэта добра ў кантэксце, што вольныя беларусы Беластока заўсёды каля консульства Беларусі выказвалі сваю салідарнасць з народам Украіны, выступалі супраць ваеннай агрэсіі Расіі і вайны. Мы б хацелі, каб вуліца мела назву вольных Беларусі і Украіны.
Абноўлена ў 20.25. Кіраўнік Народнага антыкрызіснага ўпраўлення Павел Латушка ў адказ на ініцыятыву Тадэвуша Трускаляскага прапанаваў даць вуліцы назву Вольнай Беларусі і Украіны. Прэзідэнт Беластока адказаў Латушку ў твітары: «Гэта занадта доўгая назва, але вуліца Электрычная мае два адрэзкі, можна яе падзяліць. Той частцы, што пры консульстве, даць назву Вольнай Беларусі, a той, што паміж Браніцкага і Міцкевіча, — Вольнай Украіны».
