10 сакавіка пачынаецца суд над мастаком Алесем Пушкіным. MOST расказвае, хто такі Алесь Пушкін, і чаму яго судзяць па некалькіх крымінальных «палітычных» артыкулах.
Шлях да мастацтва
Алесь Пушкін нарадзіўся 6 жніўня 1965 года ў гарадскім пасёлку Бобр на Міншчыне. У 13 год паступіў у дзяржаўную мастацкую школу-інтэрнат, працягнуў адукацыю ў Беларускім дзяржаўным тэатральна-мастацкім інстытуце.
Пушкіна прызывалі ў армію, два гады ён адслужыў у Афганістане. Вёў у арміі пацыфісцкі дзённік на беларускай мове.
Грамадская дзейнасць
Алесь Пушкін актыўна выражаў сваю грамадзянскую пазіцыю. Мастака неаднаразова затрымлівалі супрацоўнікі міліцыі. Першае затрыманне адбылося яшчэ ў 1988 годзе за заклікі прыйсці на «Дзяды». У 1999 быў асуджаны ўмоўна на два гады за перформанс ля адміністрацыі Лукашэнкі — прывёз туды тачку гною.
Алеся Пушкіна прэвентыўна затрымлівалі перад прэзідэнцкімі выбарамі ў 2000-х.
Затрыманне і абвінавачванні
Пушкіна затрымалі 30 сакавіка 2021 года ў вёсцы Жылічы на Магілёўшчыне. 26 сакавіка пракуратура Гродна ўзбудзіла супраць мастака крымінальную справу — частка 3 артыкул 130 («Распальванне варожасці»). Падставай для ўзбуджэння справы стала выстава ў гродзенскім «Цэнтры гарадскога жыцця». На ёй Пушкін размясціў карціну з выявай Яўгена Жыхара.
Пракуратура падкрэсліла, што падчас выставы Алесь Пушкін «характеризовал Жихаря как человека из беларусского сопротивления, борца с большевиками, чем прославлял и одобрял его действия».
Напрыканцы лістапада 2021 года Пушкіна са следчага ізалятара на Валадарскага ў Мінску накіравалі ў лякарню ў Навінкі для правядзення псіхіятрычнай экспертызы. У снежні мастака вярнулі на «Валадарку».
У канцы снежня следства прад’явіла фінальныя абвінавачванні Пушкіну:
- наўмысныя дзеянні па рэабілітацыі нацызму, учыненыя групай асоб;
- здзек з дзяржаўных сімвалаў.
Суд над мастаком пачынаецца 10 сакавіка. Пушкін пачаў яго з перфоманса: лёг на лаву і адвярнуўся, піша «Вясна».
