Павел Латушка і Народнае антыкрызіснае ўпраўленне заклікалі прызнаць Беларусь тэрыторыяй, часова акупаванай Расіяй, а рэжым Лукашэнкі — марыянеткавым урадам.
Латушка заклікаў падтрымаць заяву саюзнікаў па дэмакратычным руху, а замежных партнёраў — даць адпаведную міжнародна-прававую ацэнку сітуацыі.
У заяве адзначаецца, што калі факт акупацыі Беларусі шырока прызнаюць на міжнароднай арэне, то будзе магчыма прасоўваць шэраг пытанняў:
- аб захоўванні тэрытарыяльнай цэласнасці і незалежнасці Беларусі;
- аб прадухіленні размяшчэння на тэрыторыі Беларусі расійскай ядзернай зброі і стварэння пагроз рэгіянальнай бяспецы;
- аб ацэнцы любой актыўнасці грамадзян Беларусі ў супрацьстаянні рэжыму Лукашэнкі і расійскай акупацыі як дзеянняў, якія здзяйсняюцца ў рамках нацыянальна-вызваленчага руху па абароне суверэнітэту і незалежнасці нашай краіны;
- аб пазбаўленні марыянеткавага ўрада Лукашэнкі міжнародна-прававой суб’ектнасці і аб прыпыненні членства Беларусі ў міжнародных арганізацыях — да спынення акупацыі і дэмакратычнага фарміравання новага ўрада;
- аб сінхранізацыі санкцый у дачыненні да Расіі і Беларусі як акупаванай тэрыторыі і ліквідацыі магчымасцяў для Расіі аб абыходзе санкцый праз Беларусь і выкарыстанні нашай краіны як афшорнай зоны.
