24 сакавіка Памежная служба Польшчы падпісала кантракт на будаўніцтва электроннага бар’ера на польска-беларускай мяжы. Пра гэта паведамляе Радыё Рацыя са спасылкай на польскае Міністэрства ўнутраных спраў і адміністрацыі.
— Даўжыня электроннага бар’ера складзе 202 кіламетры, ён ахопіць усе ўчасткі агароджы, якая будуецца, а таксама частку памежных вод, — заявіў намеснік міністра ўнутраных спраў Мацей Вонсік.
Для выкананне ўсіх запланаваных работ заключаны кантракт на суму больш за 332 млн злотых. Прадмет кантракта — праектаванне і стварэнне комплексу электронных прылад з праграмным забеспячэннем, кампанентамі інфармацыйна-камунікацыйных тэхналогій і дапаможнымі элементамі для аховы дзяржаўнай мяжы.
Перыметр будзе выкарыстоўваць датчыкі, якія вызначаюць розныя фізічныя характарыстыкі аб’ектаў. Гэта дазволіць атрымаць вычарпальную карціну сітуацыі, бесперапынна збіраць, апрацоўваць і перадаваць інфармацыю незалежна ад мясцовасці і ўмоў надвор’я.
