24 сакавіка, напярэдадні Дня Волі, у Беластоку стартавалі заняткі «Мова Нанова». Імпрэзу кожныя два тыдні будуць ладзіць Беларуская дыяспара Беластока, фонд Tutaka і Беларускі МедыяПорт.
«Мова Нанова» — гэта курсы беларускай мовы, якія ядналі аматараў беларускай культуры ў многіх гарадах Беларусі. Пасля таго, як правядзенне курсаў у Беларусі стала немагчымым, ініцыятыва актыўна пашыраецца за мяжой. Заняткі ўжо ладзяцца ў Варшаве, Гданьску, Уроцлаве, Вільні і іншых гарадах свету, дзе зараз жыве вялікая колькасць беларусаў.
На першую «Мову Нанова» ў прастору «Беларускі МедыяПорт», заснаваную рэдакцыяй MOST, 24 сакавіка прыйшлі больш за 50 чалавек. Сярод іх — як прадстаўнікі беларускай дыяспары Беластока, так і беларускай меншасці Польшчы. Тэма заняткаў — Дзень Волі, гадавіна абвяшчэння Беларускай Народнай Рэспублікі.
Вядучыя Юлія Міхайлава і Ігар Палынскі расказалі гісторыю стварэння Беларускай Народнай Рэспублікі, распавялі пра лёс аднаго з заснавальнікаў БНР, пісьменніка і гісторыка Вацлава Ластоўскага. Ластоўскі быў аўтарам «Падручнага расійска-крыўскага слоўніка», удзельнікі імпрэзы шукалі сучасныя адпаведнікі прапанаваным у ім словам.
Госцем першай «Мовы Нанова» выступіў галоўны рэдактар тыднёвіка «Ніва», дырэктар «Радыё Рацыя» Яўген Вапа. Ён казаў пра культурную і гістарычную лучнасць Падляшша з Беларуссю. Прыгадаў, што першы прэм’ер-міністр БНР Язэп Варонка паходзіў з Кузніцы Беластоцкай. Спадар Яўген заклікаў вучыцца беларускай мове ўвесь час: кожны дзень чытаць, пісаць, слухаць.
Мова — прамы шлях для абароны сваёй незалежнасці, сцвярджае Яўген Вапа.
![](https://mostmedia.io/wp-content/uploads/2022/03/mn1_14-1024x768.jpg)
Музычным госцем першай «Мовы Нанова» сталі спявачка Кацярына Ваданосава і яе дачка Стэфанія. З пачаткам вайны ва Украіне Кацярына з сям’ёй пераехала з Кіева ў Беласток — дарэчы, за колькі дзён да расійскага ўварвання яна брала ўдзел у адкрыцці «Мовы Нанова» ва ўкраінскай сталіцы. Акрамя музычнага выступлення, Кацярына прачытала колькі ўласных вершаў.
Арганізатары «Мовы Нанова» ў Беластоку плануюць праводзіць заняткі двойчы на месяц па чацвяргах. Наступная імпрэза ў Беларускім МедыяПорце (Sienkiewicza 44) мае адбыцца 7 красавіка.