28 сакавіка ў Гродне пачаўся суд над Сафіяй Сапегай, затрыманай разам з Раманам Пратасевічам. Іх знялі з прымусова пасаджанага ў Беларусі рэйса Ryanair. Hrodna.life сабрала інфармацыю аб тым, што адбывалася ў судзе і каля яго.
Дзяржаўны абвінаваўца хадайнічала аб правядзенні закрытага судовага пасяджэння. Звязана гэта з тым, што ў ходзе разгляду крымінальнай справы будуць агучаныя персанальныя дадзеныя больш за 230 чалавек, сярод якіх — суддзі, пракурорскія работнікі, супрацоўнікі органаў унутраных спраў і іншыя. А таксама ў мэтах нераспаўсюду інфармацыі, якая носіць экстрэмісцкі характар, паведаміла БЕЛТА. Аб закрыцці працэсу хадайнічаў дзяржабвінаваўца, аргументаваўшы гэта тым, што «ў матэрыялах справы ёсць забаронены кантэнт», піша Sputnik. Сапега падтрымала хадайніцтва, «бо ў яго ходзе могуць быць агучаныя персанальныя дадзеныя афіцыйных асоб», напісала карэспандэнтка «Мінскай праўды» Дыяна Шыбкоўская.
Прапагандыст Ігар Тур паведаміў, што пасяджэнне будзе закрытым «як мінімум з-за матэрыялаў, якія носяць непублічны характар».
Справу разглядае суддзя Віктар Сянько, дзяржабвінаваўца — Наталля Сакалова. Судовая калегія палічыла магчымым і неабходным задаволіць хадайніцтва дзяржабвінаваўцы «ў інтарэсах бяспекі пацярпелых, сведак і іншых удзельнікаў працэсу», паведаміў s13.ru.
Міліцыя — у будынку і каля будынку суда
Слухачоў не ўпусьцілі ў будынак суду, спаслаўшыся на тое, што зала пасяджэнняў ўжо зачынена. Пры гэтым па часе пасяджэнне яшчэ не пачалося. Прычыну ранняга закрыцця не патлумачылі. Каля суда ў гэты час стаялі каля чатырох мужчын у цывільным, падобных да міліцыянтаў. Таксама ў будынку суда заўважылі начальніка міліцыі грамадскай бяспекі УУС Гродзенскага аблвыканкама Віталя Стасюкевіча. Двое міліцыянтаў у форме патрулявалі будынак суда. Дзяржаўную прэсу ў суд прапусцілі.
Сем артыкулаў Крымінальнага кодэкса
Сафію Сапегу затрымалі 23 траўня 2021 года разам з Раманам Пратасевічам. Іх знялі з прымусова пасаджанага ў Беларусі рэйса Ryanair. Спачатку яе абвінавацілі ў адміністраванні «экстрэмісцкага» Telegram-канала «Чорная кніга Беларусі», дзе публікуюцца асабістыя звесткі сілавікоў. Потым ёй прад’явілі абвінавачанне па сямі артыкулах Крымінальнага кодэкса.
Расследаванне яе справы праводзілі ў Мінску, але перадалі на разгляд у Гродна — магчыма, таму, што Сапега прапісаная ў Лідзе. Сафія Сапега заключыў дасудовае пагадненне са следствам. У снежні 2021-га яна напісала прашэнне аб памілаванні Лукашэнку. Таму ёй пагражае шэсць гадоў зняволення — замест 12.
Сафія Сапега прызнана палітзняволенай.
