За апошні час беларусы сутыкнуліся з абсалютна незнаёмымі выклікамі, падзеямі і рэакцыямі. Каб зразумець, як жыць у гэтай новай рэальнасці, яе неабходна асэнсаваць. Часам там, дзе не спрацоўвае нічога іншае, дапамагае мастацтва.
Падкаст-пастаноўкі па апавяданнях беларускага пісьменніка Кірыла Стаселькі агучваюць акцёры супольнасці «Купалаўцы». Першую пастаноўку «Малус» агучылі Крысціна Дробыш, Андрэй Дробыш і Міхась Зуй.
Творы Стаселькі для гэтага праекта звязаныя з падзеямі ў Беларусі. Яны аналізуюць тэмы ўлады, вайны, абсурду, адзіноты і пошуку кропак апоры.
— Гэтыя апавяданні пачаў пісаць яшчэ ў кантэксце падзей 2020 года ў спробе пераасэнсаваць шэраг важных глыбінных пытанняў і з’яваў. Тэксты працягваю рыхтаваць і, вядома, спектр гэтых пытанняў пашырыўся, у тым ліку і праз вайну, — расказаў MOST Кірыл Стаселька.
Аўтар не выключае, што ў будучым творы выйдуць асобнай кнігай. Пакуль жа ён абраў для трансляцыі гукавы фармат:
— Вялікая частка маіх чытачоў вымушана аказалася ў розных краінах свету, а кнігавыдавецтва ў Беларусі перажывае катастрафічныя ўмовы. Давялося шукаць фарматы, якія дазволяць нам з чытачамі і надалей заставацца разам, камунікаваць і абменьвацца ідэямі. Калі казаць пра тое, для каго праект, зыходзячы не са зместу, бо сюжэтныя і тэматычныя аспекты досыць шырокія, а з фармату, — то для тых, хто мусіў з’ехаць з Беларусі і не мае магчымасці чытаць беларускую літаратуру ў традыцыйным фармаце друкаванай кнігі.
Дзякуючы гэтаму праекту тэксты даступныя бясплатна і з любога геаграфічнага пункта.
Аўтар плануе выпускаць два падкасты штомесяц.
Першыя выпускі ўжо даступныя на Google Podcasts, Apple Podcasts, Spotify.
