У новым выпуску праграмы «Мы вернемся» MOST расказвае пра тэлевядучую Кацярыну Ваданосаву. Яна была аўтарам праграмы «Жывая культура» на тэлеканале Беларусь 3 і падтрымала пратэсты ў жніўні 2020, за што яе звольнілі з дзяржаўнага ТБ. Каб не патрапіць у турму Кацярына з сям’ёй з’ехала з Беларусі. Да пачатку вайны ў 2022 годзе жанчына з сям’ёй жыла ва Украіне, а пасля перабралася ў Польшчу, дзе цяпер будуе новае жыццё. Пагаварылі з Кацярынай пра яе жыццё ў Беларусі, працу на дзяржаўным ТБ, падвойнае бежанства і лёс беларускай культуры.
Амаль два месяцы Кацярына з сям’ёй жыве ў Беластоку. У гэтым горадзе яна працуе на тэлеканале «Белсат» у праграмме «Хай Так TV». Тут беларуска плануе адрадзіць свой гурт і таксама працягнуць займацца гісторыяй Беларусі.
Вось некаторыя цытаты з інтэрв’ю з Кацярынай Ваданосавай:
- Працавала на самым культурніцкім тэлеканале Беларусі, а зараз на экстрэмісцкім.
- Я ўмею рабіць кнігі, так як рабілі ў XIV-XV cтагоддзі.
- Я — мама, у мяне ёсць дзеці, і гэта займае шмат часу.
- Мы год пратрымаліся, і на пачатку быў нейкі азарт, вельмі хацелася штосьці камусьці даказаць, штосьці памяняць і зрабіць.
- Мне было даведзена прамым тэкстам, што я адпраўлюся ў турму, а дзеці — у прытулак.
- Літаральна за адзін дзень памянялася стаўленне да ўсіх беларусаў.
- Да вайны жыхары Украіны былі неабазнаныя ў нашай сітуацыі. У адзін момант мы з несвядомых сяброў паратварыліся ў самых злейшых ворагаў.
- Я магла б уявіць жыццё ў Кіеве падчас вайны, калі б у мяне не было дзяцей.
- Тое, што мы называем нармальнай беларускай культурай, — у Беларусі гэта ўсё забаронена.
- Наколькі моцна можна ненавідзець свой народ і сваю культуру, каб давесці да такога стану?..
