Непадалёк ад беларускай мяжы ў Падляскім ваяводстве Польшчы праходзяць вучэнні войск НАТА. Беларускі бок адрэагаваў праверкай сіл рэагавання ўласнай арміі.
У Падляскім ваяводстве праходзяць вучэнні сіл НАТА ў рамках «Абаронца Еўропы 2022». На гэтай тэрыторыі адпрацоўваюцца розныя тактычныя сцэнарыі. Акрамя рэгулярных войск і армій саюзнікаў, у вучэннях прынялі ўдзел фарміраванні тэрытарыяльнай абароны Падляскага ваяводства.
Тэрытарыяльная абарона Падляшша забяспечвала абарону амерыканскага дэсанту і бранятанкавай тэхнікі.
10 мая Лукашэнка правёў нараду па пытанні дзяржаўнай абарончай замовы. Пасля яе міністр абароны Беларусі Віктар Хрэнін адзначыў, што беларуская армія назірае за вучэннямі сіл НАТА і адэкватна на іх рэагуе. Хрэнін сказаў, што тактычныя групы беларускага войска адпраўляюць на кірункі, з якіх, па словах міністра, пагражаюць войскі НАТА.
У Кобрынскім і Лідскім раёнах фарміруюць войскі тэрытарыяльнай абароны. З запасу плануюць прызваць 430 чалавек.
Раней, 4 мая, у Беларусі абвясцілі раптоўную праверку сіл рэагавання.
