Ноч музеяў пройдзе ў Беластоку з 14 па 15 мая. Аб гэтым паведамляе рэсурс Historia.org.pl. У рамках гэтай акцыі можна бясплатна ці за сімвалічную плату наведаць музеі і іншыя культурныя ўстановы, якія далучыліся і падрыхтавалі для наведвальнікаў адмысловую праграму.
Ратуша
Дзе? Rynek Kościuszki 10.
Калі? Ад 18:00 да 00:00.
У беластоцкай Ратушы будзе створана адмысловая арт-прастора.
У 18:00, 20:00 і 22:00 будуць ладзіць экскурсіі па пастаяннай экспазіцыі «Галерэя польскага жывапісу». У экспазіцыі пакажуць і раскажуць пра польскі жывапіс ад другой паловы XVII да першай паловы XX стагоддзя.
У гэты ж час будзе працаваць выстава «Кветкі Еўропы» — у ёй пакажуць творы польскіх мастакоў, што захоўваюцца ў Музеі Люблінскага каталіцкага ўніверсітэта. У першую чаргу, гэта творы Яна Матэйкі, Пятра Міхалоўскага, Уладзіміра Татмаера, Яцака і Рафала Мальчэўскіх, Юзафа Хельмонскага і Станіслава Камоцкага. Разам з імі можна будзе пабачыць творы прадстаўнікоў італьянскага, фламандскага, галандскага і нямецкага мастацтва.
Музей войска
Дзе? Kilińskiego 7 і Węglowa 3.
Калі? Ад 16:00 да 00:00.
Вайсковы музей Беластока запрашае на дзве імпрэзы. У самім музеі на Kilińskiego 7 будуць працаваць экспазіцыі, а на Węglowa 3 адбудзецца выстава вайсковай тэхнікі з калекцый музея. Беластоцкаму музею з рэканструкцыяй будуць дапамагаць вайскоўцы 16-й Паморскай механізаванай дывізіі, 18-га Беластоцкага разведвальнага палка і ўдзельнікі падляскага клуба Harley-Davidson.
Музей памяці Сібіры
Дзе? Węglowa 1.
Калі? Ад 19:00 да 01:00.
Наведвальнікам у прасторы музея дапамогуць арыентавацца экскурсаводы. Спецыяльна да Ночы музеяў будзе падрыхтавана экскурсія «У савецкім пекле». Яна будзе даступная толькі падчас Ночы музеяў.
Гістарычны музей
Дзе? Warszawska 37.
Калі? Ад 18:00 да 00:00.
Гістарычны музей ладзіць мультымедыйнае шоу, якое дапаможа пазнаёміцца бліжэй з Беластокам. У ім раскажуць пра барочную архітэктуру горада, пакажуць, як жылі заможныя жыхары Беластока. Яго будуць паказваць кожныя паўгадзіны.
Супрацоўнікі музею пакажуць, як гатаваць традыцыйны кактэйль Падляшша — бузу. Гэты напой гатуюць з крупы і звычайна падаецца з халвой. Дэманстрацыі з прыгатаваннем адбудуцца ў 18:30, 20:30 і 22:00.
Музей скульптуры Альфонса Карнага
Дзе? Świętojańska 17
Калі? Ад 18:00 да 22:00.
У 18:00 і 20:00 можна будзе папрацаваць у скульптурнай майстэрні разам са скульптаркай Патрысіяй Менье. У групе можа быць да 10 удзельнікаў, узростам ад 12 год. Зарэгістравацца можна па нумары +48 509 336 862.
У 19:00 пройдзе экскурсія па пастаяннай экспазіцыі найбуйнейшага польскага скульптара XX стагоддзя Альфонса Карнага. Рэпрэзентатыўнай часткай выставы будзе галерэя выбітных палякаў, у якой прадстаўлены скульптурныя партрэты.
