Беларусы спрабавалі на двух аўто правезці амаль тысячу пачак кантрабандных цыгарэт у Польшчу. Ім пагражаюць крымінальныя артыкулы і вялікія штрафы. Пра гэта паведаміла Падляская мытна-падатковая служба.
Супрацоўнікі Падляскай мытна-падатковай службы непадалёк ад польска-беларускай мяжы спынілі два аўтамабілі для праверкі. Машыны былі з беларускімі рэгістрацыйнымі нумарамі. Падчас дэталёвага агляду аўто высветлілася, што ў іх знаходзіцца дзясятак схованак з кантрабанднымі цыгарэтамі.
У аўтамабілі Opel, якім кіраваў 33-гадовы беларус, кантрабанду схавалі ў багажніку, пад заднімі сядзеннямі і ў тунэлю рычага пераключэння перадач.
42-гадовы кіроўца Mercedes схаваў кантрабандныя цыгарэты пад бамперам, у масленым паддоне і калектары рухавіка.
Усяго ў дзвюх машынах супрацоўнікі Падляскай мытна-падатковай службы знайшлі амаль 1 000 пачак беларускіх цыгарэт. У дачыненні да кіроўцаў распачалі крымінальныя справы. Тавар быў выняты, кантрабандыстам пагражаюць вялікія штрафы.
