У беларускім бары Beer4u прайшла першая сустрэча гістарычнага клуба Beer&History. Падчас яе адбылася прэм’ера дакументальнага фільма журналіста MOST Руслана Кулевіча «Апошнія сведкі старога Гродна». Расказваем, як усё прайшло.
Увечары 22 чэрвеня ў беларускім бары Beer4u аматары гісторыі сустрэліся на першай імпрэзе гістарычнага клуба Beer&History. Стваральнікі Дарка Палынская, Алесь Кіркевіч і Аляксей Трубкін пачалі сустрэчу з прэм’еры дакументальнага фільма журналіста Руслана Кулевіча.
Фільм Кулевіча «Апошнія сведкі старога Гродна» расказваў гісторыі трох жанчын, што нарадзіліся і жылі ў Гродне ў 1930-я гады, бачылі савецкае «вызваленне», нямецкую акупацыю і пасля былі вымушаныя з’ехаць на Захад.
Фільм знаходзіцца ў адкрытым доступе, яго можна паглядзець на Youtube-канале «Мы вернёмся».
Алесь Кіркевіч расказаў прысутным, што гістарычны клуб з’яўляецца нефармальнай пляцоўкай для ўсіх, хто зацікаўлены ў гісторыі. Паводле Кіркевіча, ідэя арганізаваць клуб прыйшла падчас адной з сустрэч з сябрамі, калі яны размаўлялі пра гісторыю.
Для таго, каб паўдзельнічаць у імпрэзах Beer&History не трэба рэгістравацца, уваход вольны. Пра наступнае мерапрыемства арганізатары раскажуць у сваіх сацыяльных сетках у Telegram, Instagram і Facebook.
Пасля ўдзельнікі сустрэчы задавалі пытанні Руслану Кулевічу, а ён паказаў фотаальбом са старымі фотаздымкамі з Гродна і свае кнігі. Працяг сустрэчы прайшоў у нефармальнай абстаноўцы за кубкамі піва, кавы і гарбаты.
