Беларускі журналіст і пісьменнік Аляксандр Чарнуха прэзентаваў у Беластоку кнігу «Свиньи» — свой дэбютны раман, у якім «змяшаны фікшн і нон-фікшн, а сатыра не толькі мае тэрапеўтычны эфект, але і перасцерагае». Імпрэза прайшла ў прасторы MediaPortBelarus у Беластоку 25 чэрвеня.
Аляксандр Чарнуха быў галоўным рэдактарам музычнага партала Ultra-Music, працаваў журналістам Onliner. У Беларусі яго затрымалі 18 мая 2021 года, калі ён асвятляў разгром партала Tut.by у Мінску. Праз некалькі месяцаў Аляксандр з’ехаў з краіны, цяпер жыве ў Кракаве.
— Кнігу пачаў пісаць у кастрычніку 2020 года, скончыў у красавіку 2021-га, — расказаў Аляксандр Чарнуха. — Гэта быў перыяд, які сам за сябе кажа. Што адбывалася тады ў Беларусі, як адбывалася, з якімі эмоцыямі і пачуццямі мы жылі — гэта вельмі складана для кожнага з нас, гэта наша траўма. І мне б хацелася, каб мы не толькі пакутавалі, але і смяяліся, таму што смех — наша зброя. Кніга і пра гэта таксама.
«Свиньи» напісаныя па-руску, але аўтар адзначае, што гэта палягае на той сістэме каардынат, пабудаванай у рамане, дзе герояў праглынуў «рускі мір». Тым не меней, цяпер над перакладам кнігі на беларускую мову працуе літаратар і музыка Алесь Плотка. Скончыць працу над перакладам разлічваюць восенню.
На прэзентацыі Аляксандр Чарнуха расказаў пра тое, як стваралася кніга, зачытаў колькі ўрыўкаў з яе, адказваў на пытанні гасцей — а іх сабралася больш за 30 чалавек.
— Спадзяюся, не апошняя, — заявіў Аляксандр, адказваючы на пытанне, ці плануе пісаць далей. Таксама ён адзначыў, што, верагодна, з’явіцца працяг «Свиней», бо сусвет, створаны ў кнізе, на жаль, увасабляецца ў рэальнасць і таму гісторыя яшчэ не скончаная.
Падчас прэзентацыі мастак Яраслаў Кірвель увасобіў момант сустрэчы ў малюнку і падарыў яго Аляксандру.
Пасля ахвотныя маглі пагутарыць з аўтарам і набыць кнігу з аўтографам.
Імпрэза ў Беластоку — чацвёртая прэзентацыя «Свиней» пасля Кракава, Варшавы і Вільні. Аўтар заўважыў, што імпрэза прайшла вельмі ўтульна і па-сяброўску, у камернай атмасферы.
