Беларусы ў Польшчы далучыліся да збору сродкаў на ўдарны беспілотнік «Байрактар» для Узброеных сіл Украіны. Асобную скарбонку менавіта для беларусаў, куды збіраюцца ахвяраванні, стварыў жыхар Падляшша, журналіст Томаш Суліма.
Асноўны збор сродкаў у Польшчы на «Байрактар» на сайце Zrzutka.pl запусціў польскі журналіст Славамір Серакоўскі. На беспілотнік хочуць сабраць 22,5 млн злотых ($5 млн даляраў), ужо ёсць больш за 5,2 млн злотых. Томаш Суліма дадаў да збору палякаў асобную беларускую скарбонку. За два дні беларусы праз скарбонку сабралі больш за 32 000 злотых ($7 200).
Пад зборам маецца такі запіс: «Беларусы, якія жывуць у Польшчы, не могуць і не хочуць бяздзейнічаць перад жахлівай вайной ва Украіне. Таму падтрымліваем грашовы збор на «Байрактар» праз скарбонку! Памятаем падтрымку палякаў і ўкраінцаў пасля 2020 года. Мы не згодныя з палітыкай Рэспублікі Беларусь, акупаванай рэжымам Лукашэнкі. Мы не хочам асацыявацца з ім. Мы на баку Украіны да пераможнага канца».
MOST каротка пагутарыў з Томашам Сулімам.
— Чаму вы вырашылі стварыць менавіта асобную скарбонку і вылучыць менавіта беларускі ўнёсак у гэтую справу?
— Ну а чаму не? Гэтая вайна беларусам неабыякавая. Я маю на ўвазе і нашу меншасць у Польшчы, як і нашу дыяспару. Усё ж такі ў Польшчы тэма вайны ўжо трохі сціхла. А я заўважыў на польска-беларускай мяжы, што яна пагражае паўзучай катастрофай. Людзі проста адмаўляюцца ад беларускасці, бо ў Польшчы беларускасць атаясамліваецца амаль выключна з Лукашэнкам. Акрамя гэтага, Слава Серакоўскі, ініцыятар гэтых збораў, запрапанаваў, і я адгукнуўся: так, давайце зробім, як беларусы, пакажам салідарнасць з Украінай. Зараз ужо гэта 5 мільёнаў, гэта грандыёзная сума, якую ўдалося атрымаць, але гэтага пакуль яшчэ мала, бо патрэбна 22 мільёны. Нашая беларуская суполка за тры дні сабрала 30 000 злотых, і я лічу, што ў наступныя дні таксама падлучацца наступныя беларусы, да чаго я сардэчна запрашаю.
Што такое «Байрактар»?
«Байрактар» (Bayraktar) — гэта беспілотны ўдарны аператыўна-тактычны лятальны апарат (БПЛА). Ён быў распрацаваны ў Турцыі, і зараз у гэтых дронаў ёсць украінскія рухавікі. «Байрактары» выдатна зарэкамендавалі сябе ў баях супраць расійскіх акупантаў ва Украіне, і, мяркуючы з перахопленых размоў, захопнікі вельмі моцна іх баяцца.
Хто збірае грошы на «Байрактары»
Украінцы сабралі 600 млн грыўняў ($20 310 498) на турэцкія баявыя беспілотнікі, але кампанія Baykar вырашыла падарыць УСУ тры дроны. Сабраныя грошы перадалі на патрэбы вайскоўцаў. Літоўцы таксама далучыліся да збору на «Байрактар» і за тры дні сабралі 6 млн еўра на баявыя дроны для Украіны.
