Польскі ўрад не рэкамендуе сваім грамадзянам наведваць Беларусь. Намеснік міністра замежных спраў Польшчы Яраслаў Яблоньскі пракаментаваў для «Польскага радыё» ўвядзенне Беларуссю бязвізавага ўезду ў краіну для грамадзян Польшчы з пачаткам ліпеня.
З 1 ліпеня грамадзянам Польшчы можна прыехаць у Беларусь без наяўнасці візы. Урад Лукашэнкі заявіў, што бязвіз для грамадзян Польшчы быў уведзены «ў мэтах падтрымання добрасуседскіх стасункаў». Раней «бязвіз» быў уведзены для грамадзян Літвы і Латвіі.
— Раім быць вельмі асцярожнымі і пазбягаць паездак у Беларусь, — заявіў намеснік міністра замежных спраў Польшчы Павел Яблоньскі.
Таксама Яблоньскі падкрэсліў, што з тэрыторыі Беларусі працягваюцца напады на Ўкраіну.
— Стаўленне Беларусі як у дачыненні да Ўкраіны, так і Польшчы варожае. Калі нехта пабывае на тэрыторыі краіны, якая ставіцца да Польшчы як да ворага, то павінен усведамляць рызыку. У Беларусі зараз каля тысячы палітвязняў. Мы не забываем пра іх і прыкладаем намаганні з мэтай іх вызвалення. Міжнародны ціск трэба аказваць як на Расію, так і на Беларусь.
