16 ліпеня ўпершыню ў Беластоку пройдзе беларускамоўны стэндап. На сцэне выступяць вядомыя прадстаўнікі беларускага камедзі, якія жывуць у Польшчы. Усё мерапрыемства будзе праходзіць выключна на беларускай мове.
Першая беларускамоўная стэндап-вечарына пройдзе 16 ліпеня ў новым пабе Harrys, які адкрыўся ў Беластоку на вуліцы Баруты, 17. На мерапрыемстве выступяць Міхась Ільін, Андрусь Райн, Саша Калінкін і Ягор Анісімаў.
Квіткі на стэндап каштуюць 40 злотых. Бронь квіткоў — у direct Pan Stand up
Хто будзе выступаць?
Арганізоўвае стэндап аб’яднанне Pan Stand up, куды ўваходзяць дасведчаныя беларускія стэндап-комікі, якія былі вымушаныя з’ехаць з Беларусі і зараз выступаюць з канцэртамі ў Еўропе на рускай, беларускай і англійскай мовах.
Міша Ільін. Пачаў займацца стэндапам у родным Брэсце ў пачатку 2017 года. Ужо пасля першых выступленняў на адкрытых мікрафонах зарэкамендаваў сябе ў мясцовым стэндап-кам’юніці — быў запрошаны на разагрэў комікаў з Расіі Аляксандра Далгаполава і Расула Чабдарава. Улетку таго ж года стаў удзельнікам першага беларускага стэндап-фестывалю. У 2018-м працаваў у Варшаве, дзе не прапускаў стэндап-мерапрыемствы для рускамоўнай публікі. У канцы года пераязджае ў Мінск, дзе паралельна з працай журналіста на радыё актыўна выступае на ўсіх пляцоўках сталіцы. У 2019-м годзе стаў госцем ТБ-праграмы «Хай Так», дзе таксама выступіў са сваім маналогам. Самы папулярны беларускі стэндап-комік у твітары
Ягор Анісімаў. Сцэнарыст, рэзідэнт першага стэндап-клуба Беларусі Stand Up Comedy Hall. Выступіў на сотнях камедыйных пляцовак Беларусі, СНД і Еўропы. Як аўтар сцэнарыяў займаўся напісаннем забаўляльных ролікаў на YouTube, якія ў суме набралі больш за 2 мільярды праглядаў.
Саша Калінкін. Комік з Беларусі ў Варшаве. З’ехаў у 2021 годзе па палітычных матывах. Рэзідэнт шоу STAND-UP UNDERDOG першага стэндап-клуба ў Мінску STAND UP COMEDY HALL. Удзельнік фестывалю «Адкрыты мікрафон на ТНТ» у Маскве 2019 і 2020 гадоў. Удзельнік фестывалю «Еўрапейская камедыя ў Кіеве» ў 2021 годзе. Пераможца 18 сезона шоу «Насмяшы коміка» ва Украіне.
Андрэй Райн. Выступае са стэндапам з 2014 года. За гэты час прымаў удзел у міжнародных камедыйных фестывалях у краінах СНД. Выступаў са стэндапам у многіх гарадах Беларусі, Украіны, Польшчы, Чэхіі і Германіі.
