Некалькі тысяч загінулых падчас Аўгустоўскай аблавы — прайшло 77 гадоў са дня «аперацыі» Саветаў. Аб гэтым паведамляе Polskie Radio.
12 ліпеня 1945 года падраздзяленні Чырвонай Арміі, НКВД і савецкай контрразведкі СМЕРШ пачалі «аперацыю» на Сувальшчыне. Падчас аблавы былі забітыя сотні партызан падполля.
12 ліпеня ў Польшчы адзначаецца Дзень памяці ахвяр Аўгустоўскай аблавы.
«Аперацыя» адбывалася ў Аўгустоўскай пушчы і ваколіцах на польска-літоўскім памежжы. Польшча лічыць, што гэта было адно з буйнейшых пасляваенных злачынстваў савецкай улады супраць палякаў.
У ліпені 1945 года былі арыштаваныя больш за сем тысяч чалавек, частку якіх пасадзілі ў турмы. Каля 600 чалавек зніклі без вестак, іх лёс невядомы дагэтуль. Гісторыкі лічаць, што іх забілі на падставе рашэнняў савецкіх улад. Сапраўдная колькасць ахвяр можа складаць 2 000 чалавек.
Сведка Аўгустоўскай аблавы Антоні Лісецкі, які пазбег гібелі, расказваў пазней, што ахвяры былі пахаваныя ў Гродзенскіх фартах у Беларусі.
