Вечарам 22 ліпеня беларусы і палякі Беластока выйшлі на акцыю пратэста пад Генеральнае консульства Беларусі. Выйшлі, каб выказаць свой пратэст у сувязі з чарговым разбурэннем могілак польскіх жаўнераў у Беларусі.
Чарговы акт вандалізму зафіксаваны быў у вёсцы Стрыеўка Гродзенскай вобласці. Пра гэта паведаміў прадстаўнік Саюза палякаў у Беларусі Марэк Занеўскі. У Стрыеўцы быў знесены помнік жаўнерам Арміі Краёвай (АК), якія загінулі ў 1943 годзе ў баях з нямецкімі акупантамі.
Вечарам 22 ліпеня беларусы і палякі Беластока вырашылі выказаць свой пратэст супраць дзеянняў беларускага рэжыму і выйшлі пад Генеральнае консульства Беларусі.
— Гэта спантанная акцыя, бо гэтай ноччу прайшло яшчэ адно разбурэнне магілы недалёка ад Гродна. Вядомая ўсім Стрыеўка, дзе быў вялікі і прыгожы помнік жаўнерам Арміі Краёвай. Незразумела, якім чынам усё робіцца і для чаго. Чым замінаюць магілы продкаў? Гэта нашы продкі таксама, і чаму менавіта польскія магілы? І тут здарылася так, што гэтых людзей проста нішчаць, бураць астанкі. Гэта культура, якая сябе знішчыць сама. Не хапае слоў усё гэта выказаць, — распавёў беларускі актывіст у Беластоку Мечыслаў Навагродзкі.
View this post on Instagram
Сітуацыя ў Стрыеўцы — гэта ўжо пятае вядомае разбурэнне магіл жаўнераў Арміі Краёвай у гродзенскім рэгіёне. 1 ліпеня СМІ паведамілі пра разбурэнне пахаванняў у Ёдкавічах Бераставіцкага раёна, 4 ліпеня — у Мікулішках Ашмянскага, 8 ліпеня — у Ваўкавыску, 9 ліпеня — у Качычах Карэліцкага раёна. Старшыня Гродзенскага аблвыканкама Уладзімір Каранік, як кіраўнік рэгіёна, сітуацыю не каментуе. Ён наогул запрашае польскіх турыстаў скарыстацца бязвізавым рэжымам і наведаць Гродзеншчыну.
