14 жніўня ў Варшаве пройдзе першы футбольны турнір беларускіх аматарскіх каманд Польшчы. Дыяспару беларусаў Беластока прадставіць каманда «Зубры Падляшша».
Гета першае падобнае мерапрыемства ў Польшчы, дзе выступяць беларускія дыяспары з розных гарадоў і краін. Турнір пройдзе ў знак салідарнасці з палітычным вязнем, футбалістам і журналістам Аляксандрам Івуліным.
На турнір у Варшаве ўжо падалі заяўкі больш за 10 каманд. Адна з іх — «Зубры Падляшша», якая прадставіць беларускую дыяспару Беластока.
— У Беластоку ўжо некалькі месяцаў існуе чат аматараў футбола з Беларусі, — распавядае капітан каманды Аляксандр Каваленка. — Мы збіраемся з беларусамі і гуляем, добра праводзім час. У турніры дыяспар вырашылі ўдзельнічаць, бо хочам прадставіць беларусаў Беластока. Назву «Зубры Падляшша» выбралі шляхам галасавання. Зубр — сімвал Беларусі і Падляшша.
Аляксандр распавядае, што каманда беларускай дыяспары Беластока яшчэ фармуецца. Ствараецца дызайн формы.
— Нам хацелася б выставіць баяздольную каманду, бо на турнір збіраюцца сур’ёзныя банды. Свабодныя спартсмены выстаўляюць сваю дружыну, дзе ёсць прафесіяналы, добрая каманда ў Беларускага Дома, і нам трэба нешта баяздольнае. Пакуль у нас толькі аматары. Калі беларусы Беластока адчуваюць, што гатовыя нам дапамагчы, то хай пішуць. Раз на тыдзень мы збіраемся і гатовыя паглядзець на людзей, — распавёў Аляксандр.
Турнір у Варшаве пройдзе на футбольным полі ад Ursynowskie Centru sportu i rekreacja у Варшаве па адрасе: ul. Przy Bażantarni, 3. Памер поля — 26 на 56 метраў, пакрыццё — сінтэтычная трава, брамы — 5 на 2 метры.
Пераможцы і ўдзельнікі атрымаюць памятныя сувеніры і прызы ад Беларускага Дома.
