Анджэя Пачобута будуць судзіць за тое, што ён назваў «вызваленчы паход» Чырвонай Арміі ў Польшчу ў 1939 годзе агрэсіяй. Падрабязнасці расказвае Rzeczpospolita.
25 ліпеня Анджэю Пачобуту працягнулі тэрмін утрымання пад вартай. Гэта апошняе падаўжэнне тэрміну, бо арыштаваны не можа заставацца за кратамі больш за шэсць месяцаў без прысуду. Неўзабаве пачнецца судовы працэс.
Паводле інфармацыі Rzeczpospolita, Пачобута абвінавачваюць у «распальванні варожасці» з-за прамовы пра савецкую агрэсію супраць Польшчы ў 1939 годзе. Лукашэнкаўская прапаганда сцвярджае, што ў верасні 1939 года адбылася не агрэсія, а «вызваленне прыгнечаных Польшчай украінскага і беларускага народаў». У справе фігуруюць артыкулы ў польскіх медыя, дзе Пачобут расказвае пра жорсткае падаўленне сілавікамі пратэстаў пасля выбараў, а таксама артыкул ад 2006 года пад аўтарствам Анджэя пра камандзіра польскага антыкамуністычнага падполля на Гродзеншчыне Анатоля Радзівоніка.
Анджэй Пачобут быў затрыманы напрыканцы сакавіка 2021 года разам са старшынёй Саюза палякаў у Беларусі Анжалікай Борыс.
