Мінчанка Ганна Морская прыехала ў Беласток у пачатку ліпеня 2022 года. У Беларусі па адміністрацыйных справах сілавікі затрымлівалі 20-гадовую дзяўчыну пяць разоў. Агулам за кратамі ў нечалавечых умовах Ганна адбыла 63 дні. Наступны арышт мог стаць для Морскай па крымінальнай справе. Каб працягнуць барацьбу з рэжымам Лукашэнкі, Ганна выехала ў Польшу. Журналісты MOST запісалі гісторыю дзяўчыны пра барацьбу, збіццё, катаванні і ўмовы ўтрымання на Акрэсціна.
Ганна працавала ў Мінску барыста, таксама вучылася ў каледжы. Яе адлічылі праз чарговы арышт, калі дзяўчына была на сутках.
Першы раз Ганну затрымалі ў студзені 2021 разам з сяброўкай каля метро ў Мінску. Яе прызналі вінаватай паводле артыкула 23.34 КаАП — несанкцыянаванае пікетаванне — і арыштавалі на 15 сутак. Наступным разам дзяўчыну затрымалі праз пяць месяцаў за акцыю пратэсту, але абвінавацілі ў «дробным хуліганстве» (арт. 19.1 КаАП). Дзяўчыну асудзілі да чарговых 15 сутак арышту. Трэці раз Ганна была затрыманая на антываеннай акцыі ў Мінску, але выпадкова — яе затрымалі каля працы за тое, што яна здымала на тэлефон, як сілавікі цягнуць у бус мужчыну. Дзяўчыну схапілі ціхары за адмову паказаць тэлефон. Морскую ўтрымлівалі ў ЦІПе на Акрэсціна тры дні, а потым выпусцілі, бо скончыўся 72-гадзінны тэрмін з моманту затрымання. Праз два з паловай месяцы адміністрацыйную справу па артыкуле 24.23 КаАП спынілі праз сканчэнне тэрміну даўнасці.
У маі 2022-га да дзяўчыны прыйшлі супрацоўнікі ГУБАЗіКу, якія здзекаваліся з яе. У тэлеграме Ганна мела нік «лянівы губазік». У выніку Морскую двойчы запар асудзілі на 15 сутак за«несанкцыянаванае пікетаванне».
Пра затрыманне Ганны і ўмовы ўтрымання на Акрэсціна — у відэа. А больш падрабязна пра сваю гісторыю Ганна будзе расказваць у аўтарскай калонцы на MOST.
