Мае аўтарытэт сярод «палітычных» і звычайных арыштантаў, запісвае гісторыі сакамернікаў. Радыё Свабода расказвае, як сядзіць журналіст Дзяніс Івашын. MOST пераказвае гэты тэкст.
Пра тое, як сядзіць журналіст Дзяніс Івашын, расказаў вязень, які сядзеў з ім у гродзенскай турме. Мужчына прыгадаў момант, калі ўпершыню пабачыў журналіста: яго перавялі ў камеру. Івашын зайшоў у камеру з трыма торбамі, у адной з іх былі кнігі, лісты і рукапісы. Па словах сакамерніка, Дзяніс запісвае цікавыя гісторыі іншых людзей, з кім ён сядзіць.
— Ён мае аўтарытэт і сярод «палітыкаў», і сярод звычайных зэкаў. Такіх, як ён, адзін на тысячу. Калі вязням прапаноўваюць прызнаць віну і абяцаюць скараціць тэрмін напалову, то большасць так і робіць. Дзянісу спачатку пагражала тры гады калоніі, потым яму дакінулі артыкул аб «здрадзе» да 15 гадоў калоніі, а ён усё роўна адмаўляецца пісаць «пакаянне», маўляў, рабіце, што хочаце, а праўда на маім баку і я буду далей рабіць, што рабіў, — кажа сакамернік Дзяніса.
Таксама ён расказаў, што Івашына не любяць супрацоўнікі гродзенскай турмы і пры нагодзе помсцяць. Напрыклад, яго часта перасяляюць з адной камеры ў іншую.
Івашын — вернік грэка-каталіцкай царквы, заўсёды моліцца перад ежай, мае пры сабе крыж і Біблію.
