Многія дзеці беларусаў пайшлі не ў беларускія школы. Калі вы хацелі б, каб сыны і дочкі вывучалі беларускае, у якім бы месцы яны ні жылі, вам могуць быць карыснымі нашы парады.
Спосаб 1, сяброўскі
Новая мова лепш вучыцца ў новым моўным асяроддзі. Але і падтрымліваць сувязь з радзімай важна не толькі праз сваякоў, але і сяброў. Калі вам пашанцавала жыць у гарадах з вялікай беларускай дыяспарай, як, напрыклад, Беласток, то тут дакладна знойдуцца аднагодкі з Беларусі, з якімі будуць падобныя зацікаўленасці.
Можна пашукаць прыяцеляў сваім дзецям праз гарадскія чаты дыяспары, запытацца, чые дзеці такога ўзросту таксама падзяляюць захапленне футболам/гітарай/шахматамі. Куб жанчын Беластока ладзіць гульнятэкі для падлеткаў. Калі ў вашым населеным пункце пакуль такіх актыўнасцей няма, магчыма, іх маглі б арганізаваць вы.
Спосаб 2, адукацыйны
Беластоку пашанцавала: тут знайшліся арганізатары і для «Мова Нанова», і для гістарычнага клуба Beer&History, на які ўсё часцей бацькі прыводзяць дзяцей.
Канал «Мова Нанова» назапасіў шмат відэа як па граматыцы беларускай мовы, так і наогул пазнавальных ролікаў пра Беларусь і беларусаў. Можна, напрыклад, раз на тыдзень прысвяціць час на тое, каб сям’ёй паглядзець адзін-два запісы. Таксама шмат падобных відэа можна знайсці на канале Haroshak.by.
Спосаб 3, пазнавальны
Калі ваша дзіця з ахвотай чытае кнігі, то для вас ёсць варыянты прапанаваць як папяровую кнігу, так і электронны варыянт. Набыць беларускую папяровую кнігу ў Беластоку можна дзякуючы бібліятэцы Kamunikat — таксама тут бясплатна дасяжная вялікая колькасць беларускіх электронных кніг. Нямала важных кніг беларускіх аўтараў у электронным выглядзе можна знайсці і тут.
Спосаб 4, сістэмны
Калі вы хацелі б, каб дзіця атрымала сістэмны падыход у навучанні, ёсць прапанова. Першая беларуская анлайн-школа пад кіраўніцтвам Настассі Шпакоўскай запускае дадатковыя заняткі па школьнай праграме. Заняткі пачнуцца 24 верасня, праходзіць будуць у першай палове дня па суботах.
Дзіця можа наведваць адзін прадмет або некалькі. Прапануюць наступныя заняткі: беларуская мова, беларуская літаратура, гісторыя Беларусі, гісторыя беларускага мастацтва, урокі дабрыні з Маляванычам. Так як у беларускіх школах выкладаюць рускую мову і літаратуру, прапануюць і гэтыя прадметы — гэта можа быць актуальна для тых, хто плануе, што дзіця вернецца ў школу ў Беларусі, дзе гэтыя прадметы выкладаюць.
Дзеці будуць займацца ў адной з трох груп: малодшай, сярэдняй або старэйшай. Пакуль ідзе набор навучэнцаў, цана будзе залежыць ад колькасці вучняў, але арганізатары імкнуцца зрабіць заняткі максімальна даступнымі. Запісвацца можна праз нумар, які мы вышлем вам, калі звяжацеся з рэдакцыяй праз каментарыі ў нашым тэлеграм-канале, з дапамогай бота або па e-mail [email protected].
