Беларуская дыяспара вядзе перамовы з жыхарамі вуліцы Электрычнай у Беластоку, якія складаць апеляцыю на рашэнне ўладаў аб наданні вуліцы назвы Вольнай Беларусі.
26 верасня рада горада Беластока прыняла ўхвалу аб перайменаванні часткі вуліцы Электрычнай, на якой месціцца консульства Беларусі, у вуліцу Вольнай Беларусі. На гэтай вуліцы, насупраць консульства, з лета 2020 года рэгулярна адбываюцца пратэсты беларусаў супраць дыктатуры Лукашэнкі і вайны ва Украіне. З заявай аб перайменаванні вуліцы звярталася да гарадской рады фонл Tutaka, беларуская дыяспара і кіраўнік НАУ Павел Латушка.
Аднак гэтай пастанове супраціўляюцца жыхары вуліцы Электрычнай, якія сцвярджаюць, што гарадскія ўлады не спыталі іх меркавання.
— Нас як грамадзян трохі крыўдзіць тое, што ніхто не спытаўся нашага меркавання, — цытуе аднаго з жыхароў беластоцкая газета «Kurier Poranny».
— Я за вольную Беларусь, але павінны існаваць іншыя спосабы паказаць гэта, чым змена назвы вуліцы, — кажа іншы.
На наступны дзень пасля абвяшчэння рашэння жыхары вуліцы Электрычнай вырашылі збіраць подпісы за адмену рашэння аб перайменаванні.
— Думаю, што падпішуцца амаль сто працэнтаў [жыхароў], — сказаў суразмоўца «Kuriera Porannego».
Ваявода мае права адмяніць рашэнне
Выданне падкрэслівае, што змена назвы не пацягне за сабой грашовых расходаў для жыхароў і фірмаў, якія зарэгістраваныя на ўчастку вуліцы Электрычнай, які прапануецца перайменаваць.
Паводле заканадаўства, жыхары могуць абскардзіць рашэнне ў ваяводскім адміністрацыйным судзе або звярнуцца да ваяводы з заявай аб кантролі над рашэннем гарадской рады. Ваявода мае права адмяніць рашэнне гарадскіх уладаў.
Калі ж пастанова не будзе адмененая, то новыя шыльды з’явяцца на вуліцы праз два тыдні пасля яе афіцыйнай публікацыі.
Што кажуць палякі ў сацсетках
Пастанова аб перайменаванні вуліцы Электрычнай, а таксама пра наданне адной з развязак назвы Вольнай Украіны, сустрэла і неадназначную рэакцыю з боку жыхароў Беластока ў сацсетках.
— Як жыхар Беластока, не пагаджаюся на такую назву ні развязкі, ні вуліцы! Тут Польшча! — піша адзін з карыстальнікаў на афіцыйнай фэйсбук-старонцы горада.
— Гэты сімвалічны жэст патрэбны не толькі нам, але і палякам у Беларусі. Яны выказаліся за вольную Беларусь. Гэты жэст салідарнасці з вольнай Беларуссю патрэбны і нам, і ім, — не пагаджаецца з ім іншая карыстальніца.
Што кажа дыяспара
У нядзелю, 2 кастрычніка, адбылася сустрэча актыву беларускай дыяспары Беластока з прадстаўнікамі таварыства жыхароў вуліцы Электрычнай. Беларусы перадалі ліст падзякі жыхарам за падтрымку і салідарнасць на працягу двух гадоў.
— Наша сустрэча прайшла ў добрай прыязнай атмасферы. Жыхары сапраўды незадаволеныя тым, што ўлады не праводзілі з імі кансультацый адносна змены назвы вуліцы (трэба дадаць, што ўлады не мусяць, але могуць гэта рабіць). Жыхары будуць складаць апеляцыю на рашэнне ўладаў. Са свайго боку мы запэўнілі, што разумеем, з якімі клопатамі сутыкнуцца жыхары пры змене назвы і, калі гаворка ідзе аб фінансах, гатовыя кампенсаваць выдаткі. А ў выпадку, калі гарадскімі ўладамі будзе арганізавана грамадскае абмеркаванне пытання, мы гатовыя прыняць удзел і разам шукаць кампраміс. У кожным выпадку, мы ўдзячныя ўладам горада за знак салідарнасці, якім з’яўляецца назва вуліцы ў гонар Вольнай Беларусі. Упэўненыя, што такой вуліцы абавязкова знойдзецца месца ў Беластоку, — распавялі MOST прадстаўнікі дыяспары.
