Беларус Лукаш Леанюк абвясціў, што яго праект з мядзведзікамі ў чарговы раз удзельнічае ў гарадскім конкурсе. Калі ён выйграе, то атрымае фінансаванне з гарадскога бюджэту Беластока на яшчэ восем скульптур.
Першыя восем мядзведзікаў з’явіліся ў Беластоку ў 2021 годзе дзякуючы Лукашу Леанюку — прадстаўніку беларускай меншасці на Падляшшы. Праект увасобіў мастак Даміян Куцаба з Кракава. Кожны мядзведзік мае імя, звязанае з месцам, дзе ўсталяваны. MOST рабіў інтэрв’ю з Лукашам і расказваў пра ідэю стварэння скульптур у Беластоку.
Увасобіць задуму ў жыццё Лукаш Леанюк змог дзякуючы беластоцкаму бюджэту грамадзянскага ўдзелу. Гэта спецыяльная частка бюджэта горада, якую можна накіроўваць на розныя праекты, якія палічаць важнымі жыхары. Любы ахвотны можа падаць заяўку, а камісія абірае пераможцаў. Горад дае на гэта фінансаванне.
— У першым конкурсе, які праходзіў у 2018 годзе, мы хацелі, каб у Беластоку было 15 такіх мішак, але рэалізацыя праекта з тым самым бюджэтам была толькі ў 2021. То, вядома, што цэны пайшлі ўгару. Таму можна было рэалізаваць на тыя грошы толькі восем фігурак.
Цяпер Лукаш удзельнічае ў новым конкурсе з новымі васьмю мядзведзікамі, якіх не паспелі зрабіць у 2021 годзе. Калі беларус выйграе, то атрымае бюджэт у размеры 135 000 злотых на рэалізацыю праекта.
— Сёлета мы вырашылі дадаць яшчэ адну скульптуру, і ў выніку ў Беластоку можа быць 16 мішак, калі людзі за гэты праект прагаласуюць. Мы хочам закончыць пачатае ў 2018 годзе. Цікавасць да скульптур ёсць. Але праект не закончаны. Пакуль няма і зацікаўленасці з боку горада, каб яны ўзялі гэтых мядзведзікаў за свой брэнд.
Як прагаласаваць?
У конкурсе можа прыняць удзел любы жыхар Беластока. Прагаласаваць можна ад 3 да 17 кастрычніка. Жыхары змогуць галасаваць традыцыйна (папяровы варыянт) і ў электронным выглядзе. Кожны зможа выбраць чатыры праекты і прагаласаваць толькі адзін раз.
Мядзведзікі — сімвал Падляшша?
Лукаш тлумачыць, чаму загарэўся, каб на вуліцах з’явіліся менавіта мішкі:
— У Польшчы ёсць легенда, такі кпін — на Падляшшы, у Беластоку і іншых месцах Беласточчыны, так холадна, што тут ужо белыя мядзведзі ходзяць па вуліцах і ядуць людзей. Мне хацелася візуалізаваць гэты стэрэатып, каб беластаччане пасмяяліся з сябе. Калі чалавек сам з сябе смяецца, то іншым ужо смяяцца не хочацца. У гэтым ёсць крыху тэрапеўтычнага сэнсу, каб падбадзёрыць жыхароў, што мы супер: «Белыя мядзведзі? Ну окей, то маем белых мядзведзяў!».
Чытачы MOST збіраюць мядзедзікаў
У канцы чэрвеня 2022 года рэдакцыя MOST прапанавала чытачам пагуляць па Беластоку і адшукаць усе восем скульптур мядзведзікаў. Ганна Зубрыцкая была першай, хто сабраў міні-мядзведзікаў у розных месцах Беластока. Ад нашай рэдакцыі беларуска атрымала падарунак — кнігу Руслана Кулевіча з успамінамі гродзенскіх старажылаў.
Восем мядзведзікаў Беластока
1. Мішка Блюзмэн / Miś Bluesman
2. Мішка Гетманова / Miś Hetmanowa
3. Мішка Урсідо / Miś Ursido
4. Мішка, які штурхае мячык / Miś z Kulą
5. Мішка Студэнт / Miś Student
6. Мішка святы Мікалай / Miś św. Mikołaj
7. Мішка Гетман / Miś Hetman
8. Мішка Акцёр / Miś Aktor
