Хутка зіма — не самы просты час для аўтааматараў. Хоць да першага снегу (маем спадзеў) яшчэ далёка — як кажуць, рыхтуй сані летам. Расказваем, пра што варта паклапаціцца напярэдадні зімы, каб не здарылася непрыемных сітуацый на дарозе.
1. За адсутнасць зімовай гумы на колах аўто адказнасці ў Польшчы не прадугледжана. Тым не меней, мы настойваем, што «зіма» зімой — гэта пра здаровы сэнс. Летняя гума на зімовай дарозе проста не дазволіць вам эфектыўна затармазіць. А ў экстраннай сітуацыі ад ДТЗ выратуе толькі цуд.
Памятайце таксама, што калі ў вас «зіма», але амаль што лысая, вас могуць аштрафаваць за кепскі стан шын. А калі вы на летняй гуме зімой станеце вінаватым у ДТЗ — пакаранне будзе вельмі сур’ёзным.
Дарэчы, гума з шыпамі ў Польшчы забароненая.
2. Тармазная сістэма зімой павінна быць у стане, блізкім да ідэалу. Нават калі летам машына спыняецца без праблем, перад зімой праверыць стан тармазной вадкасці (яе наогул рэкамендуюць мяняць раз у пару год) і рознасць тармазных намаганняў будзе зусім не лішнім. Калі гэтая рознасць занадта высокая — вельмі высокая верагоднасць заносу на абледзянелай дарозе. Калодкі і дыскі або барабаны памяняць выйдзе анягож танней, чым разруліць наступствы ДТЗ.
3. Праверце акумулятар. Зімой яму спатрэбіцца больш энергіі, каб раскруціць стартар, чым у цёплы час года. Калі адчуваеце, што машына стала заводзіцца не так жвава, як раней, акумулятар можа быць адной з прычын — замяніце яго перад зімой.
Калі з ім нібыта ўсё окей, але стапрацэнтнай упэўненасці не маеце, паклапаціцеся пра наяўнасць у вас правадоў для прыкурвання. Пажадана, каб яны былі дастаткова доўгімі і трывалымі. Нават калі не спатрэбяцца вам — магчыма, зможаце дапамагчы камусьці з суседзяў па паркоўцы.
Магчыма, варта паклапаціцца нават пра пусказарадную прыладу: яна дасць дастаткова току, каб завезці аўтамабіль.
4. Набудзьце зімовую шклоамывайку-«незамярзайку». Мінусавыя тэмпературы ўжо здараюцца ўночы, і летняя вадкасць для мыцця шкла можа проста замерзнуць і сапсаваць помпу і трубкі. Звярніце ўвагу, што «незамярзайкі» могуць мець розныя мінімальныя тэмпературы, таму калі ў вашым рэгіёне тэмпература падае, напрыклад, ніжэй за 20 градусаў марозу, амывайка, разлічаная да -15°C, можа стварыць праблемы. Гэта не тая гісторыя, калі варта эканоміць.
5. Скрабок і шчотка дапамогуць разабрацца з гурбамі снегу на вашым аўто і заледзянелымі шыбамі. Яны бываюць камбінаванымі і прадаюцца не толькі ў спецыялізаваных крамах, але і ў буйных супермаркетах. А рыдлёўка дазволіць выкапаць машыну з сумёту.
6. Буксіровачны трос можа дапамагчы, калі вы захраслі ў сумёце. У аўтара гэтых радкоў такое здаралася — наяўнасць троса і красовер, які праязджаў побач, выручылі.
7. Калі вы жывяце ў горнай частцы Польшчы, то для таго, каб бяспечна падняцца або спусціцца па зімовай дарозе, вам спатрэбяцца ланцугі проціслізгацення.
Тут ёсць нават адпаведны дарожны знак.
І самае галоўнае — ваша бяспека. Калі вы не ўпэўненыя ў стане дарог, тэхнічным стане вашай машыны або ўласных скілах кіроўцы ў складаных умовах — раім пакінуць машыну на паркоўцы і вырашаць справы з дапамогай грамадскага транспарту або таксі.
