Амаль за месяц збору подпісаў, каб арганізаваць заняткі беларускай мовы ў школах Беластока, беларусам удалося сабраць больш за 30 заявак. Сёння апошні дзень, калі беларусы могуць паставіць подпіс.
Мэта кампаніі па збору подпісаў — арганізаваць заняткі беларускай мовы ў польскіх школах. Беларускую мову ў Беластоку з усіх школ цяпер выкладаюць толькі ў чацвёртай. Прычым вывучаць яе могуць толькі прадстаўнікі беларускай нацыянальнай меншасці — тыя дзеці, чые бацькі маюць польскае грамадзянства і лічаць сябе беларусамі. Тым часам у апошнюю хвалю эміграцыі ў Польшчы апынуліся беларусы, якія хацелі б забяспечыць дзяцей заняткамі беларускай мовай. Але яны не маюць польскага грамадзянства, таму не могуць накіраваць дзяцей у беластоцкую школу №4 з магчымасцю вучыць беларускую мову.
— Але мы лічым, што ведаць родную мову, літаратуру, культуру — надзвычай важна, — адзначаюць ініцыятары. Таму і абвясцілі збор заяў да Дэпартамента адукацыі аб арганізацыі заняткаў беларускай мовай для дзяцей прадстаўнікоў беларускай дыяспары.
Падпісаць зварот могуць бацькі, якія жывуць у Польшчы і маюць дзяцей школьнага або перадшкольнага ўзросту.
Як падтрымаць
Калі вы хочаце далучыцца да кампаніі, то сёння, 31 кастрычніка, — апошні дзень. Запоўніце заяву і прынясіце ў MediaPortBelarus у Беластоку па адрасе: Sienkiewicza 44. Можаце падпісаць заяву адразу на месцы — раздрукаваныя формы чакаюць вас у MediaPortBelarus. Сёння гэта можна зрабіць да 21:00 — у 19:30 тут пачнуцца другія заняткі сезона курсаў «Мова Нанова», гасцямі якіх стануць паэтка Наста Кудасава і музыкант Яўген Барышнікаў.
Пасля ініцыятары занясуць заявы ў Дэпартамент адукацыі.
«Беларускай мовай трэба карыстацца не толькі як факультатывам»
Праз збор подпісаў выказалася прадстаўніца Аб’яднанага пераходнага кабінета па нацыянальным адраджэнні Аліна Коўшык.
«Дваццаць пяць (на 31 кастрычніка 2022 года больш за 30 — MOST) чалавек паставілі свае подпісы з жаданнем змяніць сітуацыю з навучаннем беларускай мовы на Беласточчыне. 25 з дзясяткаў тысяч беларусаў. Гэтая лічба — сімвал роспачы, шматгадовай русіфікацыі і занядбання мовы. Я разумею, як складана вучыць беларускай мове, асабліва дзяцей за мяжой. Гэта вялікі высілак. І нават болей — толькі заняткаў недастаткова. Трэба ёй карыстацца не толькі як факультатывам. Хачу вас запытаць параду: што трэба зрабіць, каб бацькі хацелі вучыць дзяцей роднай мове? Што канкрэтна іх можа заахвоціць сёння?» — напісала на сваёй старонцы ў Facebook Аліна Коўшык.
