Праект беларуса Лукаша Леанюка з фігуркамі мішак у цэнтры Беластока заняў чацвёртае месца ў гарадскім конкурсе. Гэта значыць, што ён атрымае фінансаванне на чарговыя скульптуры.
Першыя восем мядзведзікаў з’явіліся ў Беластоку ў 2021 годзе дзякуючы Лукашу Леанюку — прадстаўніку беларускай меншасці на Падляшшы. У 2017 годзе за праект беларуса прагаласавалі больш за 600 беластачан. У 2022-м яго праект атрымаў амаль сем тысяч галасоў. Кожны мядзведзік мае імя, звязанае з месцам, дзе ўсталяваны. MOST публікаваў інтэрв’ю з Лукашам і расказваў пра ідэю стварэння скульптур у Беластоку.
«Во якая неспадзяванка!» — усміхаецца пры сустрэчы Лукаш Леанюк і паказвае мядзведзіка, якога нехта апрануў у вязаны шалік і шапку....
Чытаць далейDetailsУ жыхароў ёсць цікавасць да бюджэту грамадзянскага ўдзелу
У 2022 годзе на рэалізацыю праекта Лукаш атрымае 135 000 злотых з гарадскога бюджэту. У выніку ў Беластоку будзе 16 мішак — восем ужо ёсць. Увасобіць задуму ў жыццё Лукаш Леанюк змог дзякуючы беластоцкаму бюджэту грамадзянскага ўдзелу. Гэта спецыяльная частка бюджэту горада, якую можна накіроўваць на розныя праекты, якія палічаць важнымі жыхары. Любы ахвотны можа падаць заяўку, а камісія абірае пераможцаў. Горад дае на гэта фінансаванне.
У конкурсе агульнагарадскіх праектаў праект WidziMisie заняў 4 месца з больш чым 180 прапаноў.
— Цешуся, што будуць чарговыя восем фігурак у новых месцах Беластока. Я вельмі рады, што так многа людзей прагаласавалі, амаль 7 000 чалавек. Гэта ў дзесяць разоў больш, чым раней. Гэта вельмі файны вынік. Трэба адзначыць, што зараз больш людзей у Беластоку прымаюць удзел у конкурсе па бюджэту (усяго ў конкурсе галасавалі 80 000 жыхароў Беластока — MOST). Амаль кожны трэці жыхар прагаласаваў, і гэта кажа, што ў людзей ёсць цікавасць. Калі мішкі з’явяцца — мне пакуль цяжка сказаць. Першы праект быў у 2017 годзе, але рэалізаваны толькі ў 2021-м. Тады былі праблемы з конкурсам мастакоў, потым прыйшоў COVID і не было грошай у бюджэце. Можа, новыя мішкі з’явяцца да канца года, а можа, пазней. Можа, не будзе конкурсу і той самы мастак зробіць фігуркі — будзе лягчэй і без дадатковых папер. Канешне, я хацеў бы каб яны з’віліся да турыстычнага сезону, калі ў Беласток едзе многа людзей, — распавёў MOST Лукаш Леанюк.
Мядзведзікі — сімвал Падляшша?
Лукаш тлумачыць, чаму загарэўся, каб на вуліцах з’явіліся менавіта мішкі:
— У Польшчы ёсць легенда, такі кпін — на Падляшшы, у Беластоку і іншых месцах Беласточчыны так холадна, што тут ужо белыя мядзведзі ходзяць па вуліцах і ядуць людзей. Мне хацелася візуалізаваць гэты стэрэатып, каб беластачане пасмяяліся з сябе. Калі чалавек сам з сябе смяецца, то іншым ужо смяяцца не хочацца. У гэтым ёсць крыху тэрапеўтычнага сэнсу, каб падбадзёрыць жыхароў, што мы супер: «Белыя мядзведзі? Ну окей, то маем белых мядзведзяў!».
Чытачы MOST збіраюць мядзведзікаў
У канцы чэрвеня 2022 года рэдакцыя MOST прапанавала чытачам пагуляць па Беластоку і адшукаць усе восем скульптур мядзведзікаў. Ганна Зубрыцкая была першай, хто сабраў міні-мядзведзікаў у розных месцах Беластока. Ад нашай рэдакцыі беларуска атрымала падарунак — кнігу Руслана Кулевіча з успамінамі гродзенскіх старажылаў.
Восем мядзведзікаў Беластока
1. Мішка Блюзмэн / Miś Bluesman
2. Мішка Гетманова / Miś Hetmanowa
3. Мішка Урсідо / Miś Ursido
4. Мішка, які штурхае мячык / Miś z Kulą
5. Мішка Студэнт / Miś Student
6. Мішка святы Мікалай / Miś św. Mikołaj
7. Мішка Гетман / Miś Hetman
8. Мішка Акцёр / Miś Aktor
