Прарасійская арганізацыя Zadrużny Krąg арганізавала стрэльбы на Падляшшы. Па словах арганізатарах, мерапрыемства адбылося ў рамках «вызвалення Польшчы з-пад заходняй акупацыі». Пра стралецкія вучэнні расказвае Wyborcza.
Што за Zadrużny Krąg
Zadrużny Krąg — гэта ваенізаваная праварадыкальная групоўка ў Польшчы. У 2015 годзе яе лідар Артур Ц. сумесна з іншымі прадстаўнікамі нацыяналістычных арганізацый заснаваў так званую грамадзянскую гвардыю ў Бяшчадах: патрулі павіны былі кантраляваць польска-ўкраінскую мяжу, якую, па іх меркаванні, не ахоўваюць. Актывісты Zadrużny Krąg часта арганізоўваюць баявыя вучэнні, носяць палявую вайсковую форму і падтрымліваюць кантакты з ультраправымі арганізацыямі ў Расіі.
Дарэчы, Кшыштаф Талвінскі, які некалькі разоў катаўся ў Беларусі, а там яго прэзентавалі як афіцыйнага прадстаўніка Падляскага ваяводства (насамрэч, ён ім не быў), прасоўваў ідэі арганізацыі Zadrużny Krąg. Падчас візіту ў Ваўкавыск разам з Талвінскім быў член арганізацыі Арвід Плівачэўскі.
Як вучэнні рэкламавалі расійскія паблікі ў «ВКонтакте»
Фотаздымкі са стрэльбаў апублікаваў Андрэй Радыёнаў, які называе сябе рускім нацыяналістам і панславістам. Ён стварыў і ўзначальвае рух «РУСОВ» — гэта такі рух прарасійскіх экстрэмістаў, які змагаецца за пашырэнне «рускага міра». Рух таксама падтрымаў расійскую агрэсію ва Украіне.
Здымкі спачатку былі апублікаваныя ў суполцы ў ВК «Русско-славянское объединение и возрождение». Менавіта ў допісе адзначаецца, што вучэнні адбыліся на тэрыторыі Падляскага ваяводства. Нават была пазначаная дата — 29 кастрычніка 2022 года.
— Як бачыце, ёсць у Польшчы і прарускія палякі, якія змагаюцца за свабоду сваёй краіны ад заходняй акупацыі, выступаюць за саюз з Расіяй, Сербіяй і іншымі славянскімі краінамі. І іх нямала. І акурат ім належыць будучыня свабоднай Польшчы.
Людзі на фотаздымках апранутыя ў вайсковую форму з сімволікай арганізацыі Zadrużny Krąg. Аднак дзе канкрэтна ў Падляскім ваяводстве былі зробленыя здымкі — пакуль невядома.
