Гераінямі фотавыставы ў Беластоку стануць тры беларускі, якія зараз праходзяць лячэнне ад рака малочнай залозы. Гэта Каця Пытлева, Каця Ваданосава і Лена. Іх асабістыя гісторыі жыцця з ракам падрыхтавала рэдактара Hrodna.life Ірына Новік.
Рак грудзей — захворванне ў наш час нярэдкае. На яго пакутуюць каля 10% жанчын ва ўсім свеце. Перажываць анкалагічныя захворванні цяжка ўсім. Але гісторыі трох беларусак — Каці Ваданосавай, Каці Пытлевай і Лены, пра якіх расказвае праект, асабліва вострыя. Гэтыя дзяўчаты, як і многія беларусы і беларускі, сутыкнуліся з хваробай у вельмі няпросты перыяд свайго жыцця — у эміграцыі.
Яны пазбаўленыя звыклай медыцынскай падтрымкі, яны ў чужых краінах, яны ў нязвыклых абставінах, у высокім стрэсе. Іх гісторыі пражывання рака — не пра фатальнасць і безнадзейнасць. Праект «Пра рак. Гісторыі беларусак» — гэта спроба паказаць анкалагічнае захворванне праз асабісты досвед гераінь. Праз тое, як дзяўчаты прынялі сваю хваробу і суіснуюць з ёй падчас лячэння. Праз тое, што з дыягназам «рак» жыццё працягваецца.
Зараз анкалагічны дыягназ ставяць нашмат часцей, чым раней. Не таму, што ўсё вакол кепска. Проста сучасная дыягностыка дазваляе гэта зрабіць. Ці заўсёды рак звязаны з фактарамі паводзін і спадчыннасцю, што можа медыцына і як лечаць рак малочных залоз — для праекта расказаў хірург-анколаг Валерый Астапенка.
Як быць тым, у каго на рак пакутуюць блізкія, чым дапамагчы і чаго лепш не рабіць — расказала для праекта псіхолаг Вольга Вялічка.
На рак грудзей хварэюць вельмі розныя жанчыны. Тое, што хвароба прыходзіць, — не чыясьці віна. Проста так часам здараецца.
Спадзяемся, што гісторыі дзяўчат і расповеды адмыслоўцаў дапамогуць падтрымаць сваіх блізкіх, калі хто з іх хварэе на рак, ці зрабіць пэўныя захады для прафілактыкі захворвання.
КАЛІ: субота, 12 лістапада 2022 года
ЧАС: 18:30-19:30
ДЗЕ: MediaPortBelarus у Беластоку (Sienkiewicza 44, Białystok)
