Папулярны ў TikTok ксёндз з Падляскага ваяводства, пастыр моладзі ў Драгічынскай дыяцэзіі, Пётр Ярасевіч перасцерагае ў сеціве ад кніг «Гары Потэр». Па словах святара, «прыгоды з Гары Потэрам у многіх выпадках заканчваецца апантанасцю», расказывае Wyborcza.
Пётр Ярасевіч вырашыў працытаваць ксяндза, які праславіўся не толькі словамі пра апантанасць Гары Потэрам, але і тым, што выгнаў «дэманаў вегетарыянства» з дапамагой сальцісона.
@ks.piotrjarosiewicz♬ kiss the rain – yiruma
У пачатку запісу ксёндз тлумачыць, што ў яго запыталіся, ці трэба глядзець альбо чытаць «Гары Потэра». Ярасевіч кажа, што недаацэньваў гэтае пытанне, і таму прыводзіць цытату з кнігі іншага ксяндза Міхала Альшэўскага:
— Нам здаецца, духоўная рэальнасць — гэта нейкія казкі. Нам цяжка паверыць у наступствы вядзьмарства. Дзякуючы любімаму дзецьмі персанажу Гары Потэру, мы ставімся да вядзьмарства як да забавы, як да нечага пазітыўнага. На жаль, гэта толькі так здаецца. Уступленне ў прыгоды з Гары Потэрам у многіх выпадках заканчваецца апантанасцю.
— Аднойчы падчас экзарцызму я выганяў духаў Гары Потэра. Я запытаўся, чаму яны ўвайшлі ў сэрца чалавека. «Таму што гэты чалавек глядзеў і захапляўся Гары Потэрам. Мы — духі, якія носяць Дары Смерці, духі Гары Потэра», — працягвае Ярасевіч цытаваць Альшэўскага.
Гэтую цытату Ярасевіч не пакінуў без каментарыя. Па яго словах, ён нікога не хоча палохаць, але раней ён не надаваў увагі кнігам пра Гары Потэра, а пасля знаёмства са шматлікімі экзарцыстамі зрабіў вынікі: «Кожны з нас зробіць, як лічыць патрэбным, таму я ні да чаго не прымушаю. Проста дзялюся тым, што чытаў».
Відэа ў TikTok стала вельмі папулярным. Некаторыя заўважалі, што ксёндз, якога цытаваў Ярасевіч, выганяў «дэманаў вегетарыянства». Хтосьці заўважаў, што Гары Потэр з’яўляецца выдуманым персанажам, і, маўляў, немагчыма, каб ён быў духам. Іншыя каментатары падкрэслівалі, што серыя кніг пра Гары Потэра паказвае, што каханне, сяброўства і дабро могуць пераадолець любое зло.. А некаторыя проста не верылі, ці сур’ёзныя рэчы кажа Ярасевіч.
