Рэпрэсіі ў Беларусі працягваюцца: толькі ў Гродне праходзіць каля дзясятка судовых пасяджэнняў па крымінальных справах супраць людзей, якія выступілі супраць рэжыму Лукашэнкі. MOST расказвае, што адбываецца ў рэгіёне: новыя суды, затрыманні і палітычныя зняволеныя.
Судовыя пасяджэнні
У Гродне судзяць Сяргея Ануфрыенку. 41-гадовага мужчыну затрымалі па «справе Зельцара». Яго судзяць па трох артыкулах:
- частка 1 артыкул 130 — «Распальванне расавай, нацыянальнай, рэлігійнай альбо іншай сацыяльнай варожасці»;
- частка 1 артыкул 368 — «Абраза прэзідэнта»;
- артыкул 369 — «Знявага прадстаўніка ўлады».
Судовыя пасяджэнні будуць праходзіць над Анатолем Леонікам, якога абвінавачваюць у абразе і знявазе Лукашэнкі.
Былога супрацоўніка «ГроднаАзот» Эдуарда Ісаева асудзілі да трох з паловай гадоў зняволення за лайк у «Аднакласніках» за абразу і паклёп на Лукашэнку. Мужчыну затрымалі яшчэ ўлетку па адміністратыўным артыкуле. Дома ў яго засталіся жонка і дзеці.
У Гродзенскім абласным судзе праходзяць пасяджэнне па справе Сяргея Нялепкі. Мужчыну абвінавачваюць па сямі артыкулах:
- артыкул 364 — «Гвалт ці пагроза гвалту ў адносінах да супрацоўнікам органаў унутраных спраў»;
- частка 3 артыкул 361 — «Заклікі да мер абмежавальнага характару (санкцыям)»;
- частка 1 артыкул 130 — «Распальванне расавай, нацыянальнай, рэлігійнай альбо іншай сацыяльнай варожасці»;
- артыкул 369 — «Абраза прадстаўніка ўлады»;
- частка 1 артыкул 293 — «Масавыя беспарадкі»;
- частка 1 артыкул 368 — «Абраза прэзідэнта»;
- частка 2 артыкул 366 — «Гвалт ці пагроза гвалту ў адносінах да службовай асобы».
Іллю Краўчэўскага судзяць у Гродзенскім абласным судзе. Краўчэўскага абвінавачваюць аж па дзесяці крымінальных артыкулах:
- артыкул 364 — «Гвалт ці пагроза гвалту ў адносінах да супрацоўнікам органаў унутраных спраў»;
- частка 1 артыкул 342 — «Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх»;
- частка 1 артыкул 130 — «Распальванне расавай, нацыянальнай, рэлігійнай альбо іншай сацыяльнай варожасці»;
- артыкул 369 — «Абраза прадстаўніка ўлады»;
- частка 1 артыкул 293 — «Масавыя беспарадкі»;
- частка 1 артыкул 368 — «Абраза прэзідэнта»;
- частка 1 артыкул 203 — «Незаконныя дзеянні ў адносінах да інфармацыі пра прыватнае жыццё і персанальныя дадзеныя»;
- частка 2 артыкул 367 — «Паклёп у дачыненні да прэзідэнта»;
- частка 2 артыкул 366 — «Гвалт ці пагроза гвалту ў адносінах да службовай асобы»;
- артыкул 188 — «Паклёп».
Таксама судзяць В.А. Сянько і І.В. Собалева – дакладнай інфармацыі пра падсудных пакуль няма.
Штрафам скончыўся суд па «несанкцыянаваным пікетаванні» над жыхаркай Ліды. Жанчыну абвінавачвалі ў тым, што ў Дзень Незалежнасці Украіны яна запісала відэа і выклала яго ў Instagram. На відэа жанчына запальвае фаеры дзяржаўных колераў Украіны. Яе аштрафавалі на 20 базавых велічынь (640 рублёў).
«Гарадзенская правабаарона» паведамляе, што ў Гродзенскім абласным судзе 23 лістапада ідуць адміністратыўныя працэсы па справах Іллі Кадзетава і Дзмітрыя Бабкова. Мужчыны былі раней асуджаныя да зняволення: Кадзетаў да двух гадоў «хіміі», а Бабкова да аднаго года і шасці месяцаў абмежавання волі. Адміністратыўныя працэсы разглядаюцца з-за распаўсюд «экстрэмісцкай» прадукцыі.
Новыя палітвязні
На мінулым тыдні шэсць чалавек з Гродна і вобласці прызналі палітычнымі зняволенымі. Расказваем, што пра іх вядома.
Аляксандра Петушкова са Слоніма асудзілі да сямі гадоў і шасці месяцаў зняволення. Мужчыну абвінавачвалі з-за каментарыяў у інтэрнэце: нібыта ён падштурхоўваў да аднаўлення пратэстаў, абражаў Лукашэнку, а таксама ўдзельнічаў у мірных пратэстах.
Тры новыя палітвязні сядзяць з-за абразы службовай асобы. Гэта – Валер Адалеўскі з Ліды, Міхаіл Башкатаў з Гродна, Андрэй Дуброўскі з Ваўкавыска.
Кірыл Жалудок яшчэ не асуджаны, але знаходзіцца пад вартай. Мужчыну абвінавачваюць у абразе Лукашэнкі.
Дзяніса Ваўчка з Гродна судзілі за абразу Лукашэнкі і перадачу асобістых дадзеных да аднаго года і шасці месяцаў калоніі.
Затрыманні
На гэтым тыдні стала вядома пра затрыманне гродзенца. Сілавікі выклалі відэазапіс, на якім мужчына кажа, што зарэгістраваўся ў плане «Перамога», таксама былі паказаныя яго каментарыі ў Telegram. Асоба мужчыны пакуль невядомая праваабаронцам.
