13 снежня прадстаўнікі беларускай дыяспары Беластока атрымалі афіцыйны адказ ад Дэпартамента адукацыі Беластока. Бацькі падалі заявы, каб іх дзеці, якія не належаць да беларускай нацыянальнай меншасці, маглі вучыць родную мову.
Вось асноўныя палажэнні з адказу:
- Прэзідэнт Беластока Тадэвуш Трускаляскі разумее патрэбу падтрымання культурнай і моўнай тоеснасці беларусаў, якія жывуць у Беластоку, а менавіта ў арганізацыі навучання беларускай мове.
- У сувязі з гэтым быў складзены зварот да Прэзідэнта Рады Міністраў Матэуша Маравецкага з просьбай знайсці адпаведнае прававое рашэнне і фінансавыя сродкі. Пакуль адказу на зварот не атрымана.
- Паводле актуальнага права навучанне беларускай мове ў школах арганізавана толькі для польскіх грамадзян, якія належаць да нацыянальнай меншасці.
- Разам з тым органы ўлады бачаць праблему, якая будзе абмяркоўвацца на супольнай сустрэчы прадстаўнікоў міністэрства, урадавай адміністрацыі ваяводства і дэпартамента адукацыі Беластока. Сустрэча запланаваная на студзень 2023 года.
У сувязі з атрыманай інфармацыяй Беларуская Дыяспара Беластока склікае бацькоўскі сход. Сход мае адбыцца 11 студзеня 2023 года ў 18:30 у хабе «Новая Зямля» (ul. Wyszyńskiego 6a, Беласток).
— Запрашаем бацькоў, якія складалі заявы, а таксама ўсіх зацікаўленых магчымасцю арганізацыі беларускага навучання ў Беластоку. Акрамя афіцыйна-арганізацыйнай часткі запланаваная нефармальная з запрошанымі гасцямі. Сачыце за абвесткамі, — расказала MOST настаўніца беларускай мовы, прадстаўніца беларускай дыяспары Беластока Ганна Дар.
Забяспечыць дзяцей заняткамі беларускай мовай
Мэта кампаніі — арганізаваць заняткі беларускай мовы ў польскіх школах. Беларускую мову ў Беластоку з усіх школ цяпер выкладаюць толькі ў чацвёртай. Прычым вывучаць яе могуць толькі прадстаўнікі беларускай нацыянальнай меншасці — тыя дзеці, чые бацькі маюць польскае грамадзянства і лічаць сябе беларусамі.
— У апошняй хвалі эміграцыі ў Польшчы апынуліся беларусы, якія хацелі б забяспечыць дзяцей заняткамі беларускай мовы. Але яны не маюць польскага грамадзянства, таму не могуць накіраваць дзяцей у беластоцкую школу №4 з магчымасцю вучыць беларускую мову, — распавядала MOST Ганна Дар.
