MOST запускае першую «Прэмію MOST Media». Сёлета ў Беластоку прайшлі дзясяткі беларускіх мерапрыемстваў, запусціліся новыя бізнесы беларусаў, беларусы дапамагалі тым, хто меў у гэтым патрэбу. Рэдакцыя MOST з гэтай нагоды запускае першую прэмію, якая ўганаруе намаганні беларусаў у Беластоку.
Мы запускаем гэтую прэмію, каб адзначыць тых, хто апынуўся за мяжой. На жаль, пакуль што мы можам бяспечна расказваць толькі пра тыя актыўнасці, што адбываюцца не ў Беларусі. Але мы лічым важным падтрымаць тых, хто захоўвае Беларусь і за яе межамі.
У першай «Прэміі MOST» будзе пяць намінацый:
- Бізнес года. Апошняя хваля эміграцыі з Беларусі прынесла ў Беласток шмат бізнесаў, якімі карыстаюцца штодзень.
- Ініцыятыва года. Акцыі, шэсці, мерапрыемствы — у Беластоку жывуць шмат беларусаў, якія могуць арганізоўваць самыя розныя актыўнасці і аб’ядноўвацца ў важныя і патрэбныя ініцыятывы.
- Валанцёр года. Вайна ва Украіне і працяг міграцыі з Беларусі выклікалі неабходнасць у адданых людзях, якія дапамагаюць тым, каму гэта трэба.
- Артыст года. Цягам апошніх гадоў у Беласток прыехалі дзясяткі творчых беларусаў. Некаторыя з іх працягваюць займацца кар’ерай і выступаць, некаторыя адкрываюць творчыя майстэрні, хтосьці працягвае маляваць альбо спяваць. У гэтай намінацыі мы адзначаем тых, хто знайшоў у сабе сілы працягваць ствараць.
- Герой публікацыі MOST. У гэтай намінацыі пераможцу вызначае рэдакцыя MOST. «Герой публікацыі MOST» — гэта той або тая, пра каго журналісты MOST рабілі тэксты або відэа. Імя пераможцы мы агучым пасля заканчэння галасавання ў папярэдніх намінацыях.
Мы запрашаем чытачоў MOST прапаноўваць намінантаў ва ўсе катэгорыі, акрамя «Герой публікацыі MOST».
Свае прапановы вы таксама можаце дасылаць у чат-бот MOST, у наш Instagram, Facebook ці на электронную пошту.
Мы збіраем вашы прапановы да 25 снежня ўключна. Ад 26 снежня да 1 студзеня пройдзе галасаванне за намінантаў.
Узнагароджанне пераможцаў адбудзецца ў дзень нараджэння MOST — 18 студзеня 2023 года.
