Чарговы год запар 1 студзеня беларусы Беластока вышлі на забег цвярозасці. Яны прабеглі дыстанцыю ў чатыры кіламетры па вуліцах польскага горада.
Удзел у мерапрыемстве прынялі ўдзел як дарослыя, так і дзеці. Усяго каля 30 чалавек. На фінішы ўсіх удзельнікаў чакалі медалі. Паспрыяла мерапрыемству і надвор’е. У гэты дзень у Беластоку было зафіксавана рэкордна цёплае надвор’е — слупок тэрмометра ўзняўся да 15 градусаў.
Гэта другі такі забег у Беластоку, традыцыю перанялі з Гродна. Арганізатарам мерапрыемства ў Беластоку другі год запар выступае журналістка MOST Таццяна Кулевіч. Да 2020 года яна ўдзельнічала ў падобным забегу ў беларускім Гродне, дзе 1 студзеня збіраецца некалькі сотняў гараджан, каб сустрэць новы год забегам цвярозасці.
— Другі год запар мы выходзім 1 студзеня на так званы забег цвярозасці ў Беластоку. Сёлета прыйшлі бегаць тыя, хто хоча сустрэць новы год цвяроза і ў сяброўскай атмасферы. Бо як сустрэнеш, так і правядзеш. Ну хай лепш гэты год будзе актыўным. Мы заўважаем, што да такога мерапрыемства ў Беластоку расце цікавасць. Беларусы, якія пераязджаюць у Польшчу, пачынаюць займацца больш спортам. Хтосьці самастойна, хтосьці разам з намі. Бег дапамагае пазбавіцца ад дэпрэсіі і адзіноты. Таму і вынік, што людзей сёлета больш на забегу, чым летась, — распавяла Таццяна Кулевіч.
З 2021 года ў Беластоку па серадах і нядзелях праходзяць бегавыя трэніроўкі для беларусаў, якія арганізоўвае Таццяна Кулевіч.
Як далучыцца: можна з любым узроўнем фізічнай падрыхтоўкі, галоўнае-жаданне. Дадавайцеся ў Telegram-чат, дзе можна даведацца аб усіх мерапрыемствах і абнаўленнях, а таксама задаць пытанні.
Расклад прабежак: кожная серада — прабежкі ад 2,5 да 5 км, пачатак у 18:30; кожную нядзелю — прабежкі ад 2,5 да 12 км, пачатак у 08:30.
Месца сустрэч: паркоўка каля філармоніі.
