Беларускі музыка, этнограф і арт-менеджар Сяржук Доўгушаў згубіў у Варшаве пашпарт. Кінуўся шукаць — і знайшоў. Але не свой, а жанчыны-беларускі. Неўзабаве яна паведаміла Сержуку, што знайшла ягоны дакумент. Неверагоднай гісторыяй музыка падзяліўся ў Facebook і расказаў падрабязнасці MOST.
Пра страту пашпарта Доўгушаў паведаміў 16 сакавіка. Ён атрымліваў новую карту віду на жыхарства ва Упраўленні па справах замежнікаў у Варшаве. А адтуль паехаў па справах у адміністрацыю варшаўскага раёна Бялаленка. Там і заўважыў, што неяк згубіў беларускі пашпарт. Абшукаў усю машыну, перарыў кішэні — дарэмна. Вырашыў вярнуцца ва Упраўленне па справах замежнікаў у Варшаве.
«Быў там ужо некалькі разоў, усё абшукаў — няма. Крыўдна, яшчэ год дзейнічаў. Не ведаю, што і рабіць, у пятніцу трэба ехаць з выступамі ў Літву», — паскардзіўся ён.
Паступова музыка стаў усведамляць, што гастролі, верагодна, прыйдзецца адмяніць.
«Безнадзейна. Развітваюся з мінулым, адкрываю новы партал з будучым атрыманнем еўрапейскага пашпарта», — пісаў ён у адказ на пытанне пра дакумент.
«Такі мой квэст: трэба знайсці тры згубленыя беларускія пашпарты ў Варшаве, тады мой вернецца»
17 сакавіка Доўгушаў зноў паехаў у раённую адміністрацыю. Пакуль чакаў дакументы, пачуў, што ў дзяржоргане знойдзены нейкі пашпарт. Ужо вырашыў, што ягоны. Але не пашанцавала: пашпарт, хоць і быў беларускі, належаў жанчыне.
Тады беларус вырашыў дапамагчы суайчынніцы — напісаў пост у буйную групу ў Facebook «Беларусы ў Варшаве». Жанчына адгукнулася. Высветлілася, што і для яе страта пашпарта магла апынуцца вялікімі турботамі: яна мусіла ляцець у Люксембург.
«Мабыць, гэта такі мой квэст: трэба знайсці тры згубленыя беларускія пашпарты ў Варшаве, тады мой вернецца», — пажартаваў ён. Але квэст лёсу аказаўся крыху лягчэйшым.
У той самы дзень жанчына забраць пашпарт на дала рады, прыехала 18 сакавіка. І знайшла ў адміністрацыі не толькі свой пашпарт, але і Доўгушава. Каму тэлефанаваць, яна ўжо ведала.
Цяпер музыка прызнае, што атрымаў урок. І хоць дапамагаць з пошукамі трох пашпартоў не спатрэбілася, суразмоўца кажа, што цяпер будзе рабіць добрыя справы.
«Сачыце за дакументамі, ніколі не губляйце пашпарты. Асабліва беларускія», — раіць ён, маючы на ўвазе, што для многіх беларусаў атрыманне новага пашпарта зараз немагчымае.
Вы можете обсудить этот материал в нашем Telegram-канале. Если вы не в Беларуси, переходите и подписывайтесь.
