Беларусы пераехалі ў Польшчу з Браслаўшчыны, дзе ў іх была вялікая гаспадарка, і адкрылі ў новай краіне жыхарства сырны бізнес. Пра гэта расказвае «Радыё Свабода». Пераказваем гэты тэкст.
Перавезлі з Беларусі коней і сабак
Юлія Бачурынская і Аляксей Кучко жылі ў Беларусі ў Браслаўскім раёне. Яны трымалі вялікую гаспадарку: гадавалі коней, авечак, свіней, коз, кароў, а таксама займаліся вытворчасцю сыроў. Аналагічны бізнес беларусы пачалі ў Польшчы, куды яны пераехалі пасля 2020 года з часткай сваёй гаспадаркі.
Юлія расказвае, што ў Польшчу ўзялі коней і сабак. Па яе словах, у Беларусі не знайшлі надзейнае месца для коней, трох сабак аддалі добрым знаёмым і сябрам (усяго іх было сем). Для пераезду жывёлам зрабілі пашпарты і прышчэпкі, для коней асобна здавалі аналізы. З Беларусі сям’я з’язджала ў снежні 2021 года: коні ехалі з перавозчыкам, а сабак Юлія і Аляксей узялі ў машыну, таму ў Польшчу ехалі толькі з двума чамаданамі. Юлія дзеліцца, што ў Беларусі быў добры хутар, у які сям’я хацелася ўкладвацца і развівацца, але не было перспектывы.
У Польшчы пара знайшла дом у арэнду непадалёк ад Кракава. У гаспадарцы ёсць коні, сабакі, авечкі і козы.
Мясцовыя жыхары спачатку сустрэлі чужакоў насцярожана. А пасля прыйшлі знаёміцца да беларусаў, прыносілі гародніну ў падарунак. Па словах Юліі, суседзі нават просяць пасвіць іх жывёл на сваіх участках, бо ў Польшчы па заканадаўству трэба абавязковы касіць траву, а свойскія жывёл самі «косяць». Юлія лічыць, што мясцовыя жыхары ў Малапольскім ваяводстве кансерватыўныя ў выбары сыроў, на гэта арыентуюцца і вытворцы.
— Нашы ж адрозніваюцца тым, што яны любяць, па-першае, розныя гатункі. І больш адкрытыя да нечага новага, да пазнання, у тым ліку і новых гатункаў сыроў. Таму пакуль мы арыентуемся на беларусаў. Для іх робім і сыры з цвіллю, і мацарэлу з рыкотай, — кажа Юлія.
Летам больш за ўсё запатрабаваныя такія сыры, як фета і мацарэла. Гэтыя сыры падыходзяць для салатаў. Беларусы ж аддаюць перавагу сыру халюмі (яго смажаць летам на шашлыках, могуць есці і ўзімку).
Фета, мацарэла, сыркі
Летам больш за ўсё запатрабаваныя такія сыры, як фета і мацарэла. Гэтыя сыры падыходзяць для салатаў. Беларусы ж аддаюць перавагу сыру халюмі (яго смажаць летам на шашлыках, могуць есці і ўзімку).
Цяпер Аляксей і Юлія займаюцца дакументамі, якія змогуць ім дазволіць прадаваць уласныя сыры на кірмашах і рынках Польшчы.
— Ну і трэба, каб малако праходзіла розныя тэсты. Насамрэч гэта ўсё не складана. Бо тут я сутыкаюся з тым, што чыноўнікі не хочуць цябе як мага хутчэй пакараць, а стараюцца патлумачыць, дапамагчы, папярэдзіць, — кажа беларуска.
Пакуль жа асноўныя пакупнікі ў гаспадарцы Юліі і Аляксея — беларусы, прычым не толькі з Польшчы. Замовы прыходзяць з Літвы, Чэхіі, Германіі. Была нават замова са Швейцарыі. Аднак перасылка прадуктаў туды вельмі дарагая. Ад беларусаў паступіў таксама заказ на глазураваныя сыркі.
— Раней мы іх не рабілі. Вырашылі паспрабаваць. Вядома, мы не можам паўтарыць тое, як робяць сыркі на прадпрыемствах. У якасці стандарту мы ўзялі савецкі, толькі зменшылі там цукар напалову. Цяпер людзі стараюцца не спажываць шмат цукру. Некаторыя просяць увогуле без цукру рабіць. Мы робім сыркі ў горкім, малочным, белым шакаладзе, у апельсінавай глазуры, з ягадамі, — расказала Юлія.
