Вобраз папулярнага сатырычнага персанажа ў беларускім ютубе «Баба Галя» прыдумала актывістка Ганна Федаронак. Жанчына другі год жыве ў Варшаве і арганізоўвае акцыі ў падтрымку беларусаў. Таксама яна кіруе шэлтарам для беларускіх і ўкраінскіх уцекачоў. Пра «Бабу Галю» і жыццё ў эміграцыі Ганна распавяла журналістам MOST.
Да 2021 года Ганна жыла ў пасёлку Варапаева на поўначы Беларусі, працавала там як індывідуальны прадпрымальнік. У 41 год яна нарадзіла дачку, калі ўжо была бабуляй.
Па словах жанчыны, да палітычнай актыўнасці яе падштурхнула абыякавае стаўленне рэжыму Лукашэнкі да барацьбы з COVID-19. Акрамя гэтага актывістка адзначыла абуральную фальсіфікацыю вынікаў прэзідэнцкіх выбараў як па Пастаўскім раёне, так і па ўсёй Беларусі. У сваім пасёлку Ганна была незалежным назіральнікам.
— Я вымушана была з’ехаць з Беларусі ў 2021 годзе. Вымушана была пакінуць сваю краіну, бо магла апынуцца за кратамі. Сёння я жыву ў Варшаве і працую дырэктарам шэлтара для беларускіх і ўкраінскіх уцекачоў. І таксама ўдзельнічаю ў рыхтаванні беларускіх акцый у польскай сталіцы. Толькі ў Польшчы я зразумела як я люблю сваю радзіму. У гасцях добра, але дома лепей. Буду змагацца да перамогі, — кажа Ганна.
У эміграцыі Ганна прыдумала сатырычнага персанажа Бабу Галю — вобраз простай бабулі з беларусай вёскі, якая падтрымлівае Лукашэнку. Кажа што натхнілі на гэты вобраз яе суседзі-ябацькі, якія жывуць у Беларусі.
— Я тая самая Баба Галя з Варапаева. Зрабіла гэты праект каб высмейваць ябацек, якія не разумеюць што насамрэч адбываецца ў Беларусі і свеце. Гэтыя людзі жывуць ад пенсіі да пенсіі, глядзяць прапаганду, вераць ёй і не хочуць нічога мяняць у гэтым жыцці.
«Баба Галя» — папулярны сатырычны персанаж не толькі ў беларускім ютубе, але і ў TikTok.
