Гістарычны клуб Beer&History ладзіць серыю лекцый-дыскусій пра Беласточчыну. У фокусе: мова, гісторыя, вера і традыцыі рэгіёна. Уваход на сустрэчы вольны, а для тых, хто не можа быць асабіста — ёсць анлайн-трансляцыі ў YouTube.
Тэмай першай сустрэчы праекта «Свае пра сваё» была гісторыя Падляшша. Сярод гасцей быў шматгадовы актывіст беларускай меншасці ў Польшчы, гісторык, галоўны рэдактар тыднёвіка беларусаў «Ніва» і кіраўнік Беларускага Радыё Рацыя — Яўген Вапа:
— Маем тут на Падляшшы вялікую колькасць гарадоў і мястэчак, дзе на гербах прысутнічае Пагоня. Шмат помнікаў архітэктуры і знакамітых ураджэнцаў. Не забываем і пра поўдзень Падляшша на тым беразе Бугу, і гэта вельмі важна для разумення велічыні гэтага рэгіёна. Мы памятаем пра беларускасць рэгіёну і ўклад мясцовых ураджэнцаў у гісторыю Беларусі, — адзначыў Яўген Вапа.
За дзве гадзіны ўдзельнікі сустрэчы паспрабавалі ўзгадаць асноўныя вехі з гісторыі рэгіёну: ад часоў Русі да «Салідарнасці» 1980-х. Асобна размаўлялі пра асобу Кастуся Каліноўскага, ураджэнца Мастаўлянаў на Падляшшы: далёка не ўсе мясцовыя беларусы лічаць яго героем, хоць зараз сітуацыя ўжо змяняецца.
— Спадзяюся, што цыкл такіх сустрэч-дыскусій дапаможа нам, як беларускай меньшасці і вам, як дыяспары, якія прыехалі з Беларусі — інтэгравацца, — выказаў спадзеў кіраўнік фундацыі «Камунікат» Яраслаў Іванюк.
Дыскусіі будуць адбывацца на пляцоўцы MostMedia па вуліцы Сянкевіча, 44. Паводле задумкі, на кожную сустрэчу арганізатары будуць запрашаць госця-эксперта з карэнных жыхароў Падляшша.
Калі чарговая дыскусія?
Тэма: Мова Падляшша
Дата: 9 мая, аўторак
Час: 18:30
Месца: прастора MostMedia, Sinkiewicza 44
На Youtube-канале клуба Beer&History плануецца анлайн-трансляцыя сустрэч. А ў сацсетках клуба можна сачыць за абвесткамі пра чарговыя мерапрыемствы.
Цыкл дыскусій-лекцый для беларусаў у Беластоку адбываецца дзякуючы датацыі Міністра Унутраных спраў і Адміністрацыі Польшчы.
Партнёры праекту: MostMedia, Kamunikat.org, Беларускае Радыё «Рацыя»
